ރައީސުލްޖުމްހޫރިއްޔާ މުޙަންމަދު ނަޝީދު، އިނގިރޭސިވިލާތުގެ ޕާރލަމެންޓްގެ، ހައުސް އޮފް ކޮމަންސްގައި، ރޮމްފަރޑް ތަމްސީލު ކުރައްވާ މެންބަރު އެންޑްރޫ ރޮސިންޑެލްއާ މިއަދު ބައްދަލުކުރައްވައިފިއެވެ.

 
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި، ކުރިއަށް އޮތް ލޯކަލް ކައުންސިލްތަކުގެ އިންތިޚާބާ ބެހޭގޮތުން ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ. އަދި، މި އިންތިޚާބަށް ތައްޔާރުވުމާއި، ކެމްޕެއިން ކުރުން ހިނގަމުންދަނީ ޑިމޮކްރަސީއާ އެއްގޮތްވާގޮތުގެ މަތިން ވަރަށް ވާދަވެރި އަދި ޞުލްޙަވެރި މާޙައުލެއްގައިކަން ފާހަގަކުރެއްވިއެވެ.
 
އެންޑްރޫ ރޮސިންޑެލް ދެއްކެވި ވާހަކަފުޅުގައި، ރާއްޖޭގެ ޑިމޮކްރަސީ ފުރިހަމަވަމުން އަންނަ ކަމަށް ވިދާޅުވެ، ރާއްޖެއަށް މިހާރު ގެނެވިފައި މިއޮތީ ދެމެހެއްޓެނިވި ޑިމޮކްރަސީއެއްކަން ފާހަގަކުރެއްވިއެވެ. އަދި މިގޮތަށް ޑިމޮކްރަސީ ތަޢާރަފް ކުރެވޭ އެހެން ޤައުމުތަކާ އަޅާބަލާއިރު، ރާއްޖޭގެ ޑިމޮކްރެޓިކް ނިޒާމް އަށަގަންނަމުންދާލެއް އަވަސްކަމަށް ފެނިވަޑައިގަންނަވާ ކަމުގައި ވިދާޅުވިއެވެ.
 

އެންޑްރޫ ރޮސިންޑެލްއަކީ، އިނގިރޭސި ކޮންޒަރވެޓިވް ޕާޓީގެ މެންބަރެކެވެ.     އެ ޕާޓީއާ އޭނާ ގުޅިވަޑައިގަތީ 1981 ގައި، ޢުމުރުފުޅުން 14 އަހަރުގައެވެ. އޭގެފަހުން، 1983ން ފެށިގެން ކޮންޒަރވެޓިވް ޕާޓީގެ ޒުވާނުންގެ ގޮފީގެ އިސް މަގާމުތަކެއް އެންޑްރޫ ރޮސިންޑެލް ފުރުއްވާފައިވެއެވެ. މިގޮތުން، ރޮމްފަރޑްގެ ޔަންގް ކޮންޒަރވެޓިވްސްއާއި، ގްރޭޓަރ ލަންޑަން ޔަންގް ކޮންޒަރވެޓިވްސްއާއި، ނޭޝަނަލް ޔަންގް ކޮންޒަރވެޓިވްސް އަދި ޔޫރަޕިއަން ޔަންގް ކޮންޒަރވެޓިވްސްގެ ޗެއަރމަންކަން ކުރައްވާފައިވެއެވެ. އެންޑްރޫ ރޮސިންޑެލް، އިނގިރޭސި ޕާރލަމެންޓަށް އިންތިޚާބު ވެވަޑައިގެންނެވީ 2001 ވަނަ އަހަރުއެވެ.