އައްޑޫ ސިޓީ ކައުންސިލް އުފެއްދެވުމާ ގުޅިގެން އިސްތިއުނާފުގެ ފުރުޞަތު ނުވަތަ އެހެން ޤާނޫނީ ފިޔަވަޅެއް އެޅުއްވުމުގެ ފުރުޞަތު ސަރުކާރުން ބޭނުންކުރައްވާނީ، މި މަސައްކަތަށް ޤާނޫނީ އެއްވެސް ހުރަހެއް ކުރިމަތިވެއްޖެކަމުގައިވާނަމަ ކަމަށް ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ. އެ އޮފީހުން މިކަން ހާމަކުރައްވާފައިވަނީ މިރޭ ނެރުއްވި ނޫސްބަޔާނެއްގައެވެ. މި ދަންނަވާލަނީ އެބަޔާނެވެ.
ސިޓީ ކައުންސިލް އުފެއްދުމުގެ ކަންތައްތައް ޤާނޫނާއި ގަވާއިދާ އެއްގޮތަށް ގެންދެވިފައިވާ ކަމަށް ސަރުކާރުން ދެކެވަޑައިގަންނަވައެވެ. އަދި މިކަން މިގޮތަށް ގެންދެވުމަކީ، ކަންކަން ހުއްޓުމަކަށް ނައިސް، ސަރުކާރުގެ އަމާޒު ޙާސިލުވާނެ ކަމެއްވެސް މެއެވެ. މިކަމާ ގުޅިގެން، އިސްތިއުނާފުގެ ފުރުޞަތު ނުވަތަ އެހެން ޤާނޫނީ ފިޔަވަޅެއް އެޅުއްވުމުގެ ފުރުޞަތު ސަރުކާރުން ބޭނުންކުރައްވާނީ، މި މަސައްކަތަށް ޤާނޫނީ އެއްވެސް ހުރަހެއް ކުރިމަތިވެއްޖެކަމުގައިވާނަމައެވެ."