އަދަކީ ބައިނަލްއަޤުވާމީ ގޮތުން ފާހަގަކުރެވޭ ނޫސްވެރިކަމުގެ މިނިވަންކަމުގެ ދުވަހެވެ. ދުވަހާ ގުޅިގެން ދިވެހި ނޫސްވެރިކަމުގެ ދާއިރާގައި މަސައްކަތް ކުރައްވާ ހީވާގި އެންމެހާ ނޫސްވެރިންނަށާއި، މިދާއިރާގެ އެކި މަސައްކަތްތަކުގައި ޙަރަކާތްތެރިވާ އެންމެހާ ފަރާތްތަކަށާއި، ނޫސްވެރިކަމުގެ ބެލެނިވެރި ފަރާތްތަކަށް، ދުވަހުގެ ތަހުނިޔާ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އަރިސްކުރައްވައެވެ.
ނޫސްވެރިކަމަކީ ޑިމޮކްރަސީއެއް ފުރިހަމަވެގެން އަންނައިރު، ނުހަނު މުހިއްމު ދައުރެއް އަދާކުރާ އެއްޗަކަށްވީއިރު، އެއީ ޑިމޮކްރަސީގެ ހަތަރުވަނަ ބާރުގެ ގޮތުގައި ގިނަބަޔަކު އިއްތިފާޤުވާ ބާރެވެ. ގިނަގުނަ ސަބަބުތަކަށްޓަކައެވެ. ނޫސްވެރިކަމަކީ މުޖުތަމަޢުގައި ހުރި މައްސަލަތައް، ޢާންމު ސަމާލުކަމަށް ގެނުވައިދީ، ޑިމޮކްރަސީގެ ބާރުތަކަށް ފާރަވެރިވާ އެއްޗެކެވެ. ނޫސްވެރިކަމުގެ މައްޗަށް މުޖުތަމަޢެއްގެ ހަމަޖެހުން ދެމިއޮތުމާއި ނެތިދިޔުން، ބައެއްފަހަރު ބިނާވެއެވެ. ޚާއްޞަކޮށް، އަޅުގަނޑުމެންފަދަ ކުޑަކުޑަ މުޖުތަމަޢެއްގައި ނޫސްވެރިކަން އަދާކުރާ ދައުރު ބޮޑެވެ. ނޫސްވެރިކަމުގެ ޒިއްމާ އެއަށްވުރެ މާބޮޑެވެ.
ދިވެހި ނޫސްވެރިކަމަށް ބަލައިލާއިރު، ފާއިތުވެގެންދިޔަ ދުވަސްތަކުގައި، ދިވެހި ނޫސްވެރިކަން، ނާމާންކަމާއި، ބިރުވެރިކަމުގެ ދުވަސްތަކެއް ވަނީ ދެކެފައެވެ. ސިޔާސީ ހަލަބޮލިކަމުގެ ތެރޭގައި، ފުރާނަ އަތްމައްޗަށްލައްވައި، މަސައްކަތުގައި ހޭދަކުރައްވަން ޖެހިވަޑައިގެންނެވި ނޫސްވެރިން، ނިސްބަތުން މަދެއް ނުވާނެއެވެ. ރޯމާދުވާލު ސިޔާސީ ޕާޓީއެއް ރަމްޒުކޮށްދޭ ދިދަތަކާއެކު، އޮއްގަލާއި ލަޓި ދަގަނޑުބުރިން މީޑިއާގެ މުއައްސަސާއެއް ތަޅާ ސުންނާފަތި ކުރިތަން އަޅުގަނޑުމެންނަށް ވަނީ ފެނިފައެވެ. ބަޔަކު މީހުން އެމީޑިއާ މުއައްސަސާގެ ތެރެއަށް ޕެޓްރޯލްބޮން އުކައި، އަލިފާން ރޯކޮށް ހެދިއިރު، ގިސްލުމާއި ރުއިމުގެ އަޑުތައް، އެމުއައްސަސާއެއްގެ ތެރެއިން އިވިއިވި ހުރިކަން، އިއްޔެވީ ކަމެއްގެ ގޮތުގައި އަޅުގަނޑުމެންގެ ހަނދާނުގައި އެބަހުއްޓެވެ. ރާއްޖޭގޭ ޓީވީ ޗެނަލެއްގެ ތެރެއަށް ބަޔަކު ވަދެ، މުޅި ޢިމާރާތުގައި ހުޅުޖަހައި އަންދާލާފައިވެއެވެ. ދިވެހި ނޫސްވެރިޔަކަށް ވަރަށް ރަޙުމްކުޑަ ގޮތަކަށް އަނިޔާކޮށް، އޭނާގެ ފުރާނަ، މަރުގެ ތުންފަތްމައްޗަށް ވައްޓާލީ ދާދި މިދާކަށް ދުވަހުއެވެ. ސިޔާސީ ހަލަބޮލިކަމުގެ ތެރެއިން މުޒާހަރާތައް ކަވަރުކުރުމަށް ނުކުތް ބައެއް ނޫސްވެރިންނަކީ އެސިޑްފަދަ ނުރައްކާތެރި ކެމިކަލްގެ ޝިކާރައަކަށް ވެގެންދިޔަ ފަރާތްތަކެވެ. އޮއްގަލުގެ ޙަމަލާއިން ހަށިގަނޑުގެ އެތަންމިތަނުން ލޭއޮހޮރުވާލަންޖެހުނު ފަރާތްތަކެވެ. މިފަދަ ދަށު ދަރަޖައިގެ އެންމެހާ ކަންކަން ދިވެހި ސަރުކާރުން އަބަދުވެސް ކުށްވެރިކުރެއެވެ.
ކަންމިހެން ހުރިއިރު، މިފުރުޞަތުގައި ދިވެހި ނޫސްވެރިންގެ ހިތްވަރާއި ޢަޒުމަށް ސާބަސް ދަންނަވަން ޖެހެއެވެ. މި ޚިދުމަތުގައި ކެރިވަޑައިގެން ސާބިތުވެ ތިއްބެވީތީއެވެ. އެދުވަހު އަލިފާނުގައި އަނދަމުންދިޔަ މީޑިއާގެ މުއައްސަސާތައް، އެޙާދިސާއަށްފަހު އަނެއްކާވެސް ހަށިފޮޅާލައި ޚިދުމަތާއިގެން ތެދުވީތީއެވެ. އެތައް އަނިޔާތަކާއި އިންޒާރުތަކަށް ސިހިވަޑައިނުގެން، މިއަދުވެސް ނޫސްވެރިކަމުގައި ނޫސްވެރިން ދެމިތިއްބެވީތީއެވެ.
ނޫސްވެރިކަމުގެ ދާއިރާގައި ޙަރަކާތްތެރިވާ ފަރާތްތަކާއި، މީޑިއާގެ މުއައްސަސާތަކުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ކުރަންޖެހުނު ކޮންމެ ކަމެއް، އަޅަންޖެހުނު ކޮންމެ ފިޔަވަޅެއް، މި ސަރުކާރުން އަޅާނެކަމުގެ ފުރިހަމަ ޔަޤީންކަން، މިފުރުޞަތުގައި އެންމެހާ ދިވެހި ނޫސްވެރިންނަށާއި، މިދާއިރާގެ މަސްއޫލުވެރި ފަރާތްތަކަށް އަރުވަމެވެ.
ނޫސްވެރިންގެ މެދުގައި ތަފާތުކުރުމެއްނެތި މަޢުލޫމާތު ހޯދައި ލިބިގަތުމުގެ ޙައްޤަށް، މިސަރުކާރުން ފުރިހަމައަށް އިޙްތިރާމް ކުރެއެވެ. އެގޮތުން 'މަޢުލޫމާތު ހޯދައި ލިބިގަތުމުގެ ޙައްޤު' ގެ ޤާނޫނު ރައީސުލްޖުމްހޫރިއްޔާ ވަނީ 12 ޖަނަވަރީ 2014 ގައި ތަޞްދީޤު ކުރައްވައި ގެޒެޓު ކުރައްވާފައެވެ. އަދި އެޤާނޫނަށް ޢަމަލުކުރާ ތާރީޚު އަންނަންވާއިރަށް، ޤާނޫނުގައި ލާޒިމުކުރާ އެންމެހާ އިންތިޒާމްތައް ހަމަޖެއްސެވުމުގެ މަސައްކަތް ސަރުކާރުން ކުރައްވަމުން ގެންދަވާ ވާހަކަ ދަންނަވަމެވެ.
މިސަރުކާރުގެ އެއްވެސް މުއައްސަސާއަކީ ނޫސްވެރިޔާ ނިސްބަތްވާ އިދާރާއަކުން ނުވަތަ ނޫސްވެރިޔާ ގެނެސްދެއްވާ ޚަބަރެއްގެ ސަބަބުން، ނޫސްވެރިޔާއަށް ވަނުން މަނާވެފައި ހުންނާނެ ތަންތަނެއް ނޫނެވެ. ވަކި މީޑިއާގެ މުއްސަސާއަކަށް ނޫސްވެރިޔާ ނިސްބަތްވީތީ، އެއްވެސް ނޫސްވެރިޔަކީ މަޢުލޫމާތު ލިބިގަތުމުގެ ޙައްޤުން މަޙްރޫމްވެފައިވާ ފަރާތަކަށް ވެގެން ނުދާނެކަމުގެ ފުރިހަމަ ޔަޤީންކަން، ދިވެހި ސަރުކާރުން އަރުވައެވެ. ދިވެހިރާއްޖޭގެ ޤާނޫނުއަސާސީ އާއި ނޫސްވެރިކަމުގެ ދާއިރާއާ ގުޅުންހުރި އެންމެހާ ގަވާޢިދުތަކެއް ތަންދިން އެންމެ ފުޅާ ދާއިރާއެއްގައި، ޒިއްމާދާރުކަމާއެކު، ޚަބަރާއި މަޢުލޫމާތު ފެތުރުއްވުމަށް، މި ސަރުކާރުން މަރުޙަބާ ކިޔައެވެ. ހަމައެއާއެކު، މީގެކުރިން މީޑިއާގެ ފަރާތްތަކާމެދު ކޯޓުތަކުގައި އުފުލިފައިހުރި ބައެއް މައްސަލަތައް، މިސަރުކާރު އައުމާއެކު ވަނީ އަނބުރާ ގެންދަވާފައެވެ. މިއިން އަންގައިދެނީ މިސަރުކާރަކީ ނޫސްވެރިންނާއި ނޫސްވެރިކަމުގެ އިދާރާތަކަށް ލުއިފަސޭހަ މަގުން ކަންކަން ކޮށްދެއްވާނެ ސަރުކާރެއްކަމެވެ.
އެހެން ނަމަވެސް، އެއްވެސް ޒިއްމާދާރުކަމެއްނެތި، ނޫސްވެރިކަމުގެ އިންތަކާއި މިންތައް ފަހަނައަޅާ، ޚަބަރުފަތުރާ ވަސީލަތްތަކަކީ މީހުންގެ އަބުރު ނަގައިލުމަށާއި، މުޖުތަމަޢު ފަސާދަކުރުމަށް ކުރެވޭ މަސައްކަތެއް ކަމުގައިވާނަމަ، އެކަންކަން ހުއްޓުވުމަށްޓަކައި ކުރެވެން ހުރި ހުރިހާ މަސައްކަތެއް، ކަމާ ގުޅުންހުރި އިދާރާތައް މެދުވެރިކޮށް، މިސަރުކާރުން ކުރާނެއެވެ. ނޫސްވެރިކަން ރެގިއުލޭޓް ކުރުމުގެ ޒިއްމާ ޙަވާލުވެވިފައިވާ ފަރާތްތަކުން މިހާރަށްވުރެ ބޮޑަށް، ޢަމަލުކުރައްވަމުން ގެންދަވާ ނިޒާމްތައް ހަރުދަނާކުރައްވަންޖެހޭ ކަމުގައި ސަރުކާރުން ދެކެއެވެ. ވަކިން ޚާއްޞަކޮށް، މީޑިއާގެ ކަންކަން ރެގިއުލޭޓް ކުރުމުގައި، ކޮންމެވެސް އެއް ޒިއްމާދާރު ފަރާތެއް ހުރުމަކީ، މިދާއިރާގައި މަސައްކަތް ކުރައްވާ ގިނަ ފަރާތްތަކެއް އެއްބަސްވެވަޑައިގަންނަވާ ކަމެއްކަމުގައި ސަރުކާރުން ޤަބޫލުކުރަމެވެ.
ދިވެހި ނޫސްވެރިންނަކީ، ސިޔާސީ އެންމެހައި ނުފޫޒުތަކުން ސަލާމަތްވެ، ފުރިހަމަ މިނިވަންކަމާއެކު ޚަބަރާއި މަޢުލޫމާތު ފޯރުވައިދިނުމުގައި ޙަރަކާތްތެރިވާ ފަރާތްތަކަށްވުމަކީ ދިވެހި ނޫސްވެރިކަމަށް އޮންނަ އިތުބާރު ބޮޑުވެގެންދާނެ ކަމެއްކަން ކަށަވަރެވެ. މިސަރުކާރުން އެދެނީ، އަބަދުވެސް ދިވެހި ނޫސްވެރިކަމަށް އިތުރު ކުރިއެރުމާއި މުއްސަނދިކަމެވެ. ދިވެހި ނޫސްވެރިންނަށް ރައްކާތެރިކަމާއި ބާއްޖަވެރިކަމެވެ. މާތްﷲ، ތިޔަ ލޮބުވެތި ނޫސްވެރިން ކުރައްވަމުން ގެންދަވާ ޤައުމީ މަސައްކަތްޕުޅުގައި ހެޔޮ ތައުފީޤު ދެއްވާށިއެވެ. އާމީން.