ދިވެހިރާއްޖޭގެ ޤައުމީ ޔުނިވަރސިޓީ ޤާއިމް ކުރެއްވުމުގެ ރަސްމިއްޔާތު، މާދަމާ ހެނދުނު 10 ޖަހާއިރު ދަރުބާރުގޭގައި އޮންނާނެއެވެ. މިރަސްމިއްޔާތުގައި، ރައީސުލްޖުމްހޫރިއްޔާ މުޙަންމަދު ނަޝީދު، ދިވެހިރާއްޖޭގެ ޤައުމީ ޔުނިވަރސިޓީ ޤާއިމް ކުރެއްވުމުގެ ޤަރާރު، މިނިސްޓަރ އޮފް އެޑިޔުކޭޝަން ޞިފާ މުޙަންމަދާ ޙަވާލުކުރައްވާނެއެވެ. އަދި ޔުނިވަރސިޓީގެ ޗާންސެލަރގެ މަގާމަށް ރައީސުލްޖުމްހޫރިއްޔާ ބޭފުޅަކު ޢައްޔަން ކުރައްވައި، އެބޭފުޅަކަށް އެކަމުގެ ފަތްކޮޅު ދެއްވުމާއި، ޔުނިވަރސިޓީގެ ސިއްކަ، ޗާންސެލަރާ ޙަވާލުކުރެއްވުންވެސް، މިރަސްމިއްޔާތުގައި އޮންނާނެއެވެ.
މިރަސްމިއްޔާތުގައި، ރައީސުލްޖުމްހޫރިއްޔާ މުޙަންމަދު ނަޝީދު ވާހަކަފުޅު ދައްކަވާނެއެވެ. އަދި މަތީ ތަޢްލީމާބެހޭ މަޖިލީހުގެ ރައީސް، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ވަޙީދުވެސް ވާހަކަފުޅު ދައްކަވާނެއެވެ.