އިއްޔެ ރާއްޖޭގައި ބޭއްވި ލޯކަލް ކައުންސިލުގެ އިންތިޚާބުގައި އެމް.ޑީ.ޕީ ވަރަށް ރަނގަޅު ނަތީޖާއެއް ހާސިލުކުރުމާ ގުޅިގެން،ރައީސުލްޖުމްހޫރިއްޔާ މުޙަންމަދު ނަޝީދު، އެމް.ޑީ.ޕީ ގެ ރައީސް އިބްރާހީމް ޙުސައިން ޒަކީއަށާއި، އެމް.ޑީ.ޕީ ގެ ޗެއަރޕާރސަން އަލްއުސްތާޛާ މާރިޔާ އަޙްމަދު ދީދީއަށާއި، ޕާލަމެންޓްރީ ގްރޫޕުގެ ލީޑަރ ރީކޯ މޫސާ މަނިކަށާއި، ޕާލަމެންޓްރީ ގްރޫޕުގެ ހުރިހާ މެންބަރުންނަށާއި، އެމް.ޑީ.ޕީ ގެ ހުރިހާ މެންބަރުންނަށާއި، ޕާޓީއަށް ތާއީދު ކުރައްވާ ހުރިހާ ފަރާތްތަކަށް ތަހުނިޔާ ވިދާޅުވެއްޖެއެވެ. މި އިންތިޚާބުގައި މާލޭ ސިޓީ ކައުންސިލުގެ 9 ގޮޑިއާއި، އަދި އައްޑޫ ސިޓީ ކައުންސިލްގެ ހުރިހާ ގޮޑިއާއި އަދި އާބާދީ ގިނަ ރަށްރަށުން ގިނަ އަދަދެއްގެ ގޮޑި އެމް.ޑީ.ޕީ ކާމިޔާބުކުރިކަން ރައީސުލްޖުމްހޫރިއްޔާ ވަރަށް ޚާއްޞަ ގޮތެއްގައި ފާހަގަކުރައްވައެވެ.
ލޯކަލް ކައުންސިލުގެ އިންތިޚާބުގައި އެމް.ޑީ.ޕީ މި ހޯދި ކުރިއެރުމަކީ، މި އިންތިޚާބަށް ތައްޔާރުވުމަށް ވަރަށް ކުރިއްސުރެ ފަށައިގެން ޕާޓީގެ ޕާލަމެންޓްރީ ގްރޫޕުންނާއި، އެމް.ޑީ.ޕީ އަށް ތާއީދުކުރައްވާ ހުރިހާ ފަރާތްތަކުން ކުރެއްވި ބުރަ މަސައްކަތުގެ ނަތީޖާ ކަމަށް ރައީސުލްޖުމްހޫރިއްޔާ ދެކެވަޑައިގަންނަވައެވެ. އަދި މި އިންތިޚާބަށް އެމް.ޑީ.ޕީ އިން މުޅި ރާއްޖޭގައި ވަރަށް ފުޅާދާއިރާއެއްގައި ހިންގި ކެމްޕޭނުގެ ސަބަބުން، ރައްޔިތުންގެ ހިތްތަކުގައި އެމް.ޑީ.ޕީ އަށް އޮތް ތާއީދާއި ލޯބި އިތުރުވެގެންދިޔަކަންވެސް ރައީސުލްޖުމްހޫރިއްޔާ ފާހަގަކުރައްވައެވެ.
ވާދަވެރި ޕާޓީގެ ލީޑަރ އަޙްމަދު ތަސްމީން ޢަލީއާވެސް ރައީސުލްޖުމްހޫރިއްޔާ މިއަދު ވަނީ ފޯނުން ގުޅުއްވާފައެވެ. ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޑިމޮކްރަސީގެ ރީތި ހަމަތަކާ އެއްގޮތްވާ ގޮތުގެ މަތިން މި އިންތިޚާބަށް ޑީ.އާރު.ޕީ އިން ކުރި ކެމްޕޭން ފާހަގަކުރެއްވިއެވެ. އަދި ރާއްޖޭގައި ޑިމޮކްރަސީ ހަރުދަނާ ކުރެއްވުމަށާއި، ޑިމޮކްރަސީގެ ރީތި އުސޫލުތަކާ އެއްގޮތަށް ކަންތައްތައް ގެންދެވުމަށް ސަރުކާރުން ކުރައްވަމުން ގެންދަވާ މަސައްކަތްތަކުގައި ތަސްމީނުގެ ފުރިހަމަ އެއްބާރުލެއްވުން، ސަރުކާރަށް ލިބިވަޑައިގަންނަވާނެކަމަށް ޔަޤީން ކުރައްވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.