ސްރީލަންކާގެ 63 ވަނަ މިނިވަންދުވަހުގެ މުނާސަބަތުގައި، ސްރީލަންކާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، މިސްޓަރ ޑިކްސަން ސަރަތުޗަންދްރަ ދޭލާ ބޭއްވެވި ޙަފްލާގައި، ރައީސުލްޖުމްހޫރިއްޔާ މުޙަންމަދު ނަޝީދާއި، އެމަނިކުފާނުގެ އަނބިކަނބަލުން ލައިލާ ޢަލީ، ރޭ ބައިވެރިވެވަޑައިގެންފިއެވެ.
ޓްރޭޑަރޒް ހޮޓެލް މާލޭގައި އޮތް މި ޙަފްލާގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސްރީލަންކާގެ މިނިވަންދުވަހުގެ ތަހުނިޔާއާއި ހެޔޮއެދުންތައް، ސްރީލަންކާގެ ރައްޔިތުންނަށް ރައީސުލްޖުމްހޫރިއްޔާ ފޮނުއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖެއާއި ސްރީލަންކާއާއި ދެ ޤައުމުގެ ދެމެދުގައި އޮންނަނީ، ވަރަށް ޒަމާންވީ އަދި ގާތް ގުޅުމެއް ކަމާއި، ސްރީލަންކާއަކީ ރާއްޖޭގެ އެންމެބޮޑު އެއް ވިޔަފާރީގެ ބައިވެރިޔާ ކަމުގައި ބަޔާން ކުރައްވަމުން، ސްރީލަންކާ، ތަރައްޤީގެ މަގުގައި ކުރިހޯދުމާއި، އެޤައުމުގައި ޞުލްޙަވެރިކަން ޤާއިމްވެފައި އޮތުމަކީ، އެކަމުގެ ފައިދާ ރާއްޖެއަށްވެސް ލިބޭނެ ކަމެއް ކަމުގައި ވިދާޅުވިއެވެ.
މީގެއިތުރުން، ސްރީލަންކާގެ ހަނގުރާމަނިމި، އެ ޤައުމުގައި ޞުލްޙަވެރިކަން ޤާއިމްވުމާ ގުޅިގެން، އަނެއްކާވެސް އެ ޤައުމުގެ ތަރައްޤީގެ ލަނޑުދަނޑިތައް ޙާޞިލް ކުރުމުގެ މަސައްކަތް، އިތުރު ބާރަކާއެކު ފަށާފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ސްރީލަންކާގެ ރައީސް މަހިންދަ ރާޖަޕަކްސާގެ ޒަޢާމަތުގައި، އެ ޤައުމުގެ ރައްޔިތުންނަށް އިތުރު ކުރިއެރުން ލިބިގެންދާނެ ކަމަށް ޔަޤީން ކުރައްވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ސްރީލަންކާއަށް މިނިވަންކަން ލިބިފައިވަނީ 4 ފެބްރުއަރީ 1948 ގައެވެ.