ރައީސުލްޖުމްހޫރިއްޔާ މުޙަންމަދު ނަޝީދު، މިލަދުންމަޑުލު ދެކުނުބުރީ މަނަދުއަށް ވަޑައިގެން، އެ ރަށުގެ ރައްޔިތުންނާ މިއަދު ބައްދަލުކުރައްވައިފިއެވެ.
ރައީސުލްޖުމްހޫރިއްޔާ، މަނަދޫ ރައްޔިތުންނާ ބައްދަލުކުރައްވައި، މަނަދޫގެ ތަރައްޤީއަށް ސަރުކާރުން ރާއްވަވާފައިވާ ޕްރޮގްރާމްތަކުގެ މަޢުލޫމާތު ރައްޔިތުންނާ ޙިއްސާ ކުރެއްވިއެވެ. މިގޮތުން، ސަރުކާރުން ވަޢުދުވެވަޑައިގެންފައިވާ ފަދައިން، މަނަދޫގައި، ރައްޔިތުންނަށް ބޯހިޔާވަހިކަން ހޯއްދަވައިދެއްވުމަށް އަޅުއްވާ ފްލެޓް އެޅުއްވުމުގެ މަސައްކަތް ސަރުކާރުން ބާރަށް ކުރިއަށް ގެންދަވާނެ ކަމުގައި ވިދާޅުވިއެވެ. އަދި މަނަދޫގެ ބަނދަރު ތަރައްޤީ ކުރެއްވުމުގެ ޕްރޮގްރާމް ނިމޭއިރު، އެ ބަނދަރު ތަރައްޤީވެގެންދާނީ އާ ތިންވަނަ ޖެނެރޭޝަންގެ ބަނދަރެއްގެ ގޮތުގައިކަން އެމަނިކުފާނު ހާމަކުރެއްވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، ސަރުކާރުގެ އަމާޒަކީ، އެ ބަނދަރު މެދުވެރިކޮށް، މަނަދުއާއި މަނަދޫ ކައިރީގައިވާ ރަށްރަށާއި ދުރުގައިވާ ހުރިހާ ރަށްރަށް ގުޅާލައި، އެއީ އިޤްތިޞާދީ ތަރައްޤީއާއި ދަތުރުފަތުރުގެ ނާރެހަކަށް ހެއްދެވުމެވެ. މަނަދޫ ބަނދަރާއި، މަނަދޫ ބަނދަރުމަތި، މި ތަޞައްވުރާ އެއްގޮތަށް ތަރައްޤީ ކުރެއްވުމަށް، މިއަހަރުގެ ބަޖެޓްގައި ހިމަނުއްވާފައިވާކަންވެސް ރައީސުލްޖުމްހޫރިއްޔާ ހާމަކުރެއްވިއެވެ. މީގެއިތުރުން، މަނަދޫ ވަށައިގެން ހުރި ރަށްރަށުގައި ތަރައްޤީ ކުރައްވާ ރެޒޯޓްތަކަށް ބޭނުންވާ ބައެއް މަސައްކަތްތައް، މަނަދޫގައި ހިންގުމަށް މަގުފަހި ކުރެއްވުމަށް ސަރުކާރުގެ ސިޔާސަތު ތަންފީޒު ކުރައްވަމުން ގެންދަވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މަނަދޫގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މަނަދޫގައި ލިބެންހުރި ޞިއްޙީ ޚިދުމަތުގެ ފެންވަރު ރަނގަޅު ކުރެއްވުމަށްޓަކައި، މިއަހަރުގެ ތެރޭގައި މަނަދޫގައި ޓެލެމެޑިސިންގެ ޚިދުމަތް ޤާއިމް ކުރައްވާނެ ކަމުގައި ވިދާޅުވިއެވެ. އަދި ސަރުކާރުގެ ތަޢުލީމީ ސިޔާސަތުގެ އަމާޒު ކަމުގައިވާ އޯ ލެވެލް އިމްތިޙާނުގައި ބައިވެރިވާ ކުދިންގެ 60 އިންސައްތަ ކުދިންނަކީ، ފަސް މާއްދާއިން ފާސްވާ ކުދިންނަށް ހެއްދެވުމުގެ އަމާޒު ޙާޞިލު ކުރެއްވުމަށް ސަރުކާރުން ކުރައްވާ މަސައްކަތުގެ ނަތީޖާ، އެންމެ ފުރިހަމައަށް ފެންނެ އެއްރަށަކީ މަނަދޫކަމަށް ރައީސުލްޖުމްހޫރިއްޔާ ވިދާޅުވިއެވެ. މިގޮތުން، މިދިޔަ އަހަރު މަނަދޫއިން އޯލެވެލް އިމްތިޙާނުގައި ބައިވެރިވި ކުދިންގެ 50 އިންސައްތަ ކުދިން، އިމްތިހާނުން ފާސްވެފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ.
މަނަދުއަށް ކަރަންޓްގެ ޚިދުމަތް ދިނުމުގެ މަސައްކަތް، ޔޫޓިލިޓީ ކުންފުންޏާ ހަވާލުކުރެއްވުމުގެ ނަތީޖާއެއްގެ ގޮތުން ރައްޔިތުންގެ ކަރަންޓު ބިލުން އެވްރެޖްކޮށް 300 ރުފިޔާ ކުޑަވެފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ސަރުކާރުގެ ސިޔާސަތާ އެއްގޮތްވާ ގޮތުގެމަތިން ސަބްސިޑީ ދެއްވަން ފަށްޓަވާފައިވާ ކަމަށާއި، ކަރަންޓް ސަބްސިޑީގެ ގޮތުގައި ކޮންމެ މަހަކު ޖުމްލަ އެއްލައްކަރުފިޔާ މަނަދޫއަށް ދެއްވަމުން ގެންދަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުގެ އިޖްތިމާޢީ ރައްކާތެރިކަމުގެ ޕްރޮގްރާމްގެ ކާމިޔާބީގެ ސަބަބުން، މަނަދޫއަށް ލިބެމުންދާ ކުރިއެރުމުގެ މައްޗަށްވެސް ރައީސުލްޖުމްހޫރިއްޔާ އަލިއަޅުއްވާލެއްވިއެވެ.