ދެކުނު ކޮރެއާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، މިސްޓަރ ޗޮއި ކީ-ޗުލް، ރައީސުލްޖުމްހޫރިއްޔާގެ އަރިހަށް އިޙްތިރާމްގެ ޒިޔާރަތެއް މިއަދު ކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު މެންދުރުފަހު ބޭއްވެވި މި ބައްދަލުކުރެއްވުމުގައި، މައިގަނޑު ގޮތެއްގައި މަޝްވަރާ ކުރެއްވީ، ރާއްޖެއާއި ދެކުނު ކޮރެއާއާ ދެ ޤައުމުގެ ދެމެދުގައިވާ ގާތް ގުޅުން އިތުރަށް ބަދަހިކުރެއްވުމާ ބެހޭގޮތުންނެވެ. މީގެ ތެރޭގައި ސަރުކާރުގެ ގެދޮރު އެޅުމުގެ މަޝްރޫއާޢި، ހަކަތައިގެ ދާއިރާއިންނާއި، ރާއްޖެއަށް އެހީތެރިވެދިނުމާ ބެހޭގޮތުން ރައީސުލްޖުމްހޫރިއްޔާއާއި ސަފީރު މަޝްވަރާ ކުރެއްވިއެވެ.
ސަފީރުގެ ވާހަކަފުޅުގައި، ކޮރެއަން ޕެނިންސިއުލާރގައި ހަމަޖެހުމާއި ސުލްޙަ ޤާއިމުވެފައި އޮތުމަށް ރާއްޖެއިން ބާރުއަޅުއްވައި ތާއީދު ކުރައްވާތީ، އެކަން ފާހަގަކުރައްވައި، ދިވެހި ސަރުކާރަށް ޝުކުރު އަދާކުރެއްވިއެވެ.
މިބައްދަލުވުމުގައި ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ވަޙީދު ބައިވެރިވެވަޑައިގެންނެވިއެވެ.
