ވިލު ރީފް ރިޒޯޓްގައި ކުރި ރަމްޒީ ކައިވެންޏެއްގައި، ވަރަށް ދެރަކޮށް ކަންތައް ހިނގާފައިވާތީ، މިކައިވެނި ކުރެއްވި ދެކަނބަލުންނަށް ރައީސުލްޖުމްހޫރިއްޔާ މުޙަންމަދު ނަޝީދު ފޯނުން ގުޅުއްވައި، މަޢާފަށް އެދިވަޑައިގެންފިއެވެ. ރައީސުލްޖުމްހޫރިއްޔާ، މިއަދު މެންދުރުފަހު އެ ދެކަނބަލުންނާ ފޯނުން ގުޅުއްވައި، މި ޢަމަލުގެ ސަބަބުން އެކަމުގެ ހިތާމަ މުޅި ރާއްޖެއަށް ލިބިފައިވާ ކަމަށާއި، ރާއްޖޭގެ އެންމެން، މިކަމަށްޓަކައި އެދެކަނބަލުންގެ އަރިހުން މަޢާފަށް އެދޭ ކަމުގައި ވިދާޅުވިއެވެ. އަދި މި މައްސަލަ މޯލްޑިވްސް ޕޮލިސް ސަރވިސްއިން ތަޙްޤީޤް ކުރައްވަމުން ގެންދަވާ ކަމަށާއި، މި ކަމުގައި ބައިވެރިވާ ކަމަށް ތުހުމަތު ކުރެވޭ ދެމީހުން މިހާރު ތިބީ ކޯޓް އަމުރެއްގެ ދަށުން މޯލްޑިވްސް ޕޮލިސް ސަރވިސްގެ ފަރާތުން ތަޙްޤީޤަށް ހައްޔަރުކުރައްވާފައި ކަމަށް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ބިދޭސީން ރާއްޖޭގައި ކުރާ މިފަދަ ރަމްޒީ ކައިވެންޏާއި، ބިދޭސީ ކައިވެންޏާ ބެހޭ ހަރުދަނާ ގަވާއިދުތަކެއް އެކުލަވާލެއްވުމުގެ މަސައްކަތް ސީދާ އެމަނިކުފާނު ބެއްލެވުމުގެ ދަށުން ކުރިއަށް ގެންދަވާނެ ކަމުގެ ޔަޤީންކަން އެ ދެކަނބަލުންނަށް ދެއްވިއެވެ. އަދި ކުރިއަށް އޮތް ހަފްތާ ތެރޭގައި މިފަދަ ހަރުދަނާ ގަވާއިދެއް އެކުލަވާލައްވައި ސަރުކާރުން ޢާންމު ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އެމަނިކުފާނުގެ ޚާއްޞަ މެހްމާނުންގެ ގޮތުގައި، އެ ދެކަނބަލުންނަށް ފަސޭހަފުޅު ވަގުތެއްގައި، އަލުން ރާއްޖެއަށް ޒިޔާރަތް ކުރެއްވުމަށް އެ ދެކަނބަލުންނަށް ދަޢުވަތު ދެއްވިއެވެ.
އެ ދެކަނބަލުން ދެއްކެވި ވާހަކަފުޅުގައި، މި މައްސަލަ ފުރިހަމައަށް ތަޙްޤީޤު ކުރައްވައި، މިކަމާބެހޭ ގަވާއިދުތައް ހަރުދަނާ ކުރެއްވުމަށް ރައީސުލްޖުމްހޫރިއްޔާ ދެއްވާ އިސްކަން ފާހަގަކުރައްވައި، އެމަނިކުފާނަށް ޝުކުރު އަދާކުރެއްވިއެވެ. އަދި، މީޑިއާގެ އެކިފަރާތްތަކުން، މި މައްސަލައާ ގުޅިގެން، އެ ކައިވެނީގެ ފޮޓޯތަކާއި ވީޑިއޯ، އެ ދެކަނބަލުންގެ ހުއްދަނެތި އެކިގޮތްގޮތަށް ޢާންމު ކުރަމުންގެންދާތީ، އެކަމުގެ ސަބަބުން އެ ދެކަނބަލުންނަށް އިތުރު ނުތަނަވަސްކަމާއި ލަދުވެތިކަން ކުރިމަތިވަމުންދާތީ، އެކަން ހުއްޓަވައިދެއްވުމަށް ބާރުއަޅުއްވައިދެއްވުމަށް ރައީސުލްޖުމްހޫރިއްޔާގެ އަރިހުން އެދިވަޑައިގެންނެވިއެވެ.
މިކަމާ ގުޅިގެން، އެ ދެކަނބަލުންގެ ޒާތީކަންކަމަށާއި، އެއީ ކޮން ބައެއްކަން ޢާންމު ނުކުރެއްވުމަށް އެދިވަޑައިގަންނަވާ އެދިވަޑައިގެންނެވުމަށް އިޙްތިރާމް ކުރެއްވުމަށް ޚަބަރު ފަތުރާ ވަސީލަތްތަކުގެ ފަރާތުން ރައީސުލްޖުމްހޫރިއްޔާ މުޙަންމަދު ނަޝީދު އެދިވަޑައިގެންފިއެވެ. އަދި މިކަމާ ގުޅޭ ފޮޓޯއާއި ވީޑިއޯ، އެ ދެކަނބަލުންގެ ހުއްދަނެތި ޢާންމު ނުކުރެއްވުމަށާއި، މިކަމާބެހޭ ޚަބަރު ގެނެސްދިނުމުގައި އެ ދެކަނބަލުންނަށް އިޙްތިރާމް ކުރެއްވުމަށްވެސް ރައީސުލްޖުމްހޫރިއްޔާ އެދިވަޑައިގެންނެވިއެވެ.
ރައީސުލްޖުމްހޫރިއްޔާގެ ފޯނު ކޯލް ނިންމަވާލެއްވީ، މި މައްސަލައިގެ ތަޙްޤީޤު ކުރިއަށްދާގޮތުގެ މަޢުލޫމާތު އެމަނިކުފާނުގެ އޮފީހުން، އެ ދެކަނބަލުންނަށް ދެއްވަމުން ގެންދަވާނެ ކަމަށް ވިދާޅުވަމުންނެވެ.
ޖެނީވާގައި ހުންނަ އ.ދ.ގެ އޮފީސްތަކަށާއި، ސްވިޓްޒަރލެންޑަށް ރާއްޖެއިން ކަނޑައަޅާފައި ހުންނަވާ ސަފީރު އިރުތިޝާމް އާދަމްވެސް، އެ ދެކަނބަލުންނަށް އިއްޔެ ފޯނުން ގުޅުއްވާ ދިވެހި ސަރުކާރުގެ ފަރާތްޕުޅުންވަނީ މަޢާފަށް އެދިވަޑައިގެންފައެވެ.
