ދުނިޔޭގެ ކާބޯތަކެތީގެ ބާޒާރަށް ސައްތައިން ސައްތަ ބަރޯސާވެގެން ތިބުމަކީ ރައްކާތެރި ގޮތެއްނޫން ކަމަށާއި، ދުނިޔޭގެ އެހެން ޤައުމުތަކެކޭ އެއްފަދައިން ދިވެހިރާއްޖެއަކީ ވެސް ކާބޯތަކެތީގެ ސަލާމަތްކަން ލިބިފައިވާ ޤައުމަކަށް ހެދޭތޯ މަސައްކަތްކުރުން ވަރަށް މުހިންމު ކަމެއް ކަމުގައި ނައިބު ރައީސް ޑޮކްޓަރ މުޙަންމަދު ވަޙީދު ވިދާޅުވެއްޖެއެވެ.
އެމަނިކުފާނު މި މޭރުމުން ވާހަކަފުޅު ދެއްކެވީ، އައްޑުއަތޮޅު ހުޅުމީދޫގައި ހުންނަ އައްޑު އަތޮޅު މަދަރުސާގައި ރޭ ބޭއްވުނު ދަނޑުވެރިންގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
ނައިބު ރައީސްގެ ވާހަކަފުޅުގައި، ރާއްޖެއަކީ އާބާދީގެ ނިސްބަތުން، އެތެރެކުރާ ކާބޯތަކެތީގެ މިންވަރު ވަރަށް ބޮޑު ޤައުމެއްކަން ފާހަގަކުރެއްވިއެވެ. އަދި ދުނިޔޭގެ ބާޒާރުގައި ކާބޯތަކެތީގެ އަގުތަކަށް އަތުވެދާނެ ބޮޑު ބަދަލަކުން ރާއްޖެ ރައްކާތެރި ކުރުމަށްޓަކައި ރާއްޖޭގައި ފަސޭހައިން ހެއްދޭ ބާވަތްތައް ގިނައިން ހެއްދުމަކީ މުހިންމުކަމެއް ކަމުގައި އެމަނިކުފާނު ވިދާޅުވިއެވެ.
މީގެއިތުރުން، އެމަނިކުފާނު ދެއްކެވި ވާހަކަފުޅުގައި، ބޮޑެތިވަމުން އަންނަ ކުދިންނަކީ ދުޅަހެޔޮ ސިއްޙަތެއްގައި ބޮޑުވާ، ދިގު އިސްކޮޅަކާއި، ފުން ސިކުޑިތަކެއް ލިބިފައިވާ ބަޔަކަށް ހެދުމަށްޓަކައި ކައިބޮއެ އުޅުމުގެ ވައްޓަފާޅިއަށް ބަދަލުތަކެއް ގެންނަން ޖެހޭކަމުގައި ވިދާޅުވިއެވެ. މިކަމަށް މަގުފަހި ކުރުމަށް އެންމެ މުހިންމު ކަންކަމުގެ ގޮތުގައި އެމަނިކުފާނު ފާހަގަކުރެއްވީ، ސިއްޙަތަށް ރަގަޅު ތަރުކާރީއާއި މޭވާގެ ބާވަތްތައް ގިނައިން އުފައްދައި، ހެޔޮ އަގެއްގައި އެންމެނަށް ލިބޭނެގޮތް ތަނަވަސްވުމާއި، އާއިލާތަކުގެ ހޭލުންތެރިކަން އިތުރުކޮށް ހަށިގަނޑަށް ރަގަޅު ކާނާ އާއިލާގެ އެންމެނަށް، ޚާއްސަކޮށް އަންހެނުންނާއި ކުޑަކުދިންނަށް ދިނުމެވެ.
ދަނޑުވެރިންގެ ދުވަހުގެ ރަސްމީ އިޙްތިފާލްތަކުގައި ބައިވެރިވެވަޑައިގެންނެވުމަށް، ނައިބު ރައީސް ޑޮކްޓަރ ވަޙީދު އިއްޔެ ހުޅުމީދޫއަށް ކުރެއްވި ދަތުރުފުޅުގައި، ޒަމާނީ ފެންވަރަށް ދަނޑުވެރިކަންކުރުމުގެ ގޮތުން ބޭނުންކުރެވޭ އެކިއެކި ޓެކްނޮލޮޖީއާއި އާލާތްތަށް ދައްކުވައިދޭ މަޢުރަޒެއް އިއްޔެ ހަވީރު ހުޅުވައިދެއްވިއެވެ. އަދި، އޮޓޯޕޮޓް ހައިޑްރޮފޯނިކްސް ނިޒާމް ބޭނުންކޮށްގެން ކާބޯތަކެތީގެ ބާވަތްތައް ހެއްދުންވެސް އިފްތިތާޙް ކޮށްދެއްވިއެވެ. އަދި ދަނޑުވެރިންނަށް ބޭނުންވާ ސޮއިލް ޓެސްޓިން ކިޓް ތަޢާރަފް ކޮށްދެއްވައި، ޕެސްޓް ކޮންޓްރޯލް ޕްރޮގްރާމް އިފްތިތާޙް ކޮށްދެއްވިއެވެ. މީގެ އިތުރުން، ޝަންގްރިއްލާއާއި ސ.މީދޫ ދަންޑުވެރިންގެ ޖަމިޢްޔާއާއި ދެމެދު ދަނޑުވެރިކަމުގެ ތަކެތި ވިއްކުމުގެ އެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި އެމަނިކުފާނު ބައިވެރިވެ ވަޑައިގެންނެވިއެވެ.
މިއަހަރުގެ ދަނޑުވެރިންގެ ދުވަހުގެ ރަސްމިއްޔާތުގައި ބައިވެރިވެވަޑައިގެންނެވުމަށް، ނައިބު ރައީސް ހުޅުމީދޫއަށް ވަޑައިގެންނެވީ އިއްޔެ ހަވީރުއެވެ. މިދަތުރުފުޅު ނިންމަވާލެއްވުމަށްފަހު، އެމަނިކުފާނު މާލެ ވަޑައިގެންނެވީ މިއަދު މެންދުރުއެވެ.
