މިދިޔަ ހަފްތާގެ ތެރޭގައި ރާއްޖޭގެ ރިޒޯޓެއްގައި ކުރި ރަމްޒީ ކައިވެންޏެއްގައި ވަރަށްދެރަކޮށް ކަންތައް ހިނގާފައިވާތީ، ކުރިއަށް އޮތް ތާނގައި އެފަދަ ކަންކަން އެގޮތަށް ހިނގިޔަ ނުދެއްވުމަށް ސަރުކާރުން އަޅުއްވަން ޤަޞްދު ކުރައްވާ ފިޔަވަޅުތަކެއް މާދަމާގެ ރޭޑިޔޯ ޚިޠާބުގައި ރައީސުލްޖުމްހޫރިއްޔާ މުޙަންމަދު ނަޝީދު ހާމަކުރައްވާނެއެވެ. އަދި ބިދޭސީ ކައިވެނީގެ ކަންކަން ފުރިހަމަ އުޞޫލެއްގެ ތެރެއިން ރާއްޖޭގައި ހިންގޭނެ ނިޒާމެއް ޤާއިމު ކުރުމުގެ މައްޗަށްވެސް ރައީސުލްޖުމްހޫރިއްޔާ ބައްލަވައިލައްވާނެއެވެ.
މާދަމާ ރައީސުލްޖުމްހޫރިއްޔާ ދެއްވާ 72 ވަނަ ރޭޑިޔޯ ޚިޠާބުގައި، ސަރުކާރުން ވެވަޑައިގެންފައިވާ ވަޢުދުތައް ފުއްދެވުމަށް ކުރައްވަމުން ގެންދަވާ މަސައްކަތްތަކުގެ ކާމިޔާބީގެ މައްޗަށާއި، އެމް.ޑީ.ޕީ.ގެ 2 ވަނަ ކޮންގްރެސްގެ މައްޗަށްވެސް ބައްލަވާލައްވާނެއެވެ.
