ޑީ.އާރު.ޕީ އިން އިންތިޒާމު ކޮށްގެން، މިމަހުގެ 25ވަނަ ދުވަހުގެ ރޭ ކުރިއަށްދިޔަ މުޒާހަރާގެ ޚަބަރުތައް ހޯދުމަށް މަސައްކަތް ކުރަމުން ގެންދިޔަ ބައެއް ނޫސްވެރިންނަށް އެކިވަރުގެ ހާނިއްކަތައް ވެފައިވާތީ، އެކަމާ ގުޅިގެން ސަރުކާރުން ޢަމަލުކުރެއްވި ގޮތާމެދު އެމެރިކާ ސަފީރު މިސިޒް ޕެޓްރީޝީއާ ބުޓެނިސް ތަޢުރީފް ކުރައްވައިފިއެވެ. އެކަމަނާ މިކަމަށް ތަޢުރީފް ކުރެއްވީ، މިއަދު ހެނދުނު ރައީސުލްޖުމްހޫރިއްޔާ މުޙަންމަދު ނަޝީދުގެ އަރިހަށް ކުރެއްވި އިޙްތިރާމުގެ ޒިޔާރަތުގައި ވާހަކަފުޅު ދައްކަވަމުންނެވެ.
މި މައްސަލައާ ގުޅިގެން، މޯލްޑިވްސް މީޑިއާ ކައުންސިލާއި، މޯލްޑިވްސް ޖަރނަލިސްޓް އެސޯސިއޭޝަން، އަދި ދިވެހި ނޫސްވެރިންގެ ޤައުމީ ޖަމްޢިއްޔާގެ މެންބަރުންނާ ރައީސުލްޖުމްހޫރިއްޔާގެ ފަރާތްޕުޅުން ސްޕެޝަލް އެންވޯއި އޮފް ދަ ޕްރެޒިޑެންޓް އިބްރާހިމް ޙުސައިން ޒަކީ ބައްދަލުކުރައްވައި ބޭއްވެވި މަޝްވަރާތައް މިސިޒް ބުޓެނިސްވަނީ ވަކިން ޚާއްޞަ ގޮތެއްގައި ފާހަގަކުރައްވާފައެވެ.
މި ބައްދަލުކުރެއްވުމުގައި، ރާއްޖޭގެ އިޤްތިޞާދީ އަދި މާލީ ހާލަތާ ބެހޭގޮތުންވެސް ރައީސުލްޖުމްހޫރިއްޔާއާއި އެމެރިކާ ސަފީރާ ދެބޭފުޅުން މަޝްވަރާ ކުރެއްވިއެވެ.
