ރައީސުލްޖުމްހޫރިއްޔާގެ އޮފީހުގައި ހުރި ދުވަސްވީ ފަތްކޮޅުތަކެއް، ޑިޕާޓްމަންޓް އޮފް ހެރިޓޭޖާ މިއަދު ރަސްމީކޮށް ޙަވާލުކުރައްވައިފިއެވެ. ޤައުމީ ދާރުލްއާޘާރުގައި މިއަދު ހެނދުނު ބޭއްވެވި މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިފަތްކޮޅުތައް ޙަވާލުކުރެއްވުމުން، ދިވެހިރާއްޖޭގެ ޚަޒާނާގައި ހުރި ތާރީޚީ މަޢްލޫމާތުތަކާއި، ޢާންމުކޮށް ފެންނަންހުރި މަޢްލޫމާތުތަކުގެ ޢަދަދު ދެގުނައަށް އިތުރުވެގެން ހިނގައްޖެ ކަމުގައި ވިދާޅުވިއެވެ. މި ފަތްކޮޅުތައް ގިނަ ދުވަހަށް ދެމިހުންނާނެ ގޮތަކަށް ހެއްދެވުމަށް ރައީސުލްޖުމްހޫރިއްޔާގެ އޮފީހުން ކުރެއްވި މަސައްކަތްޕުޅުތަކަށް ރައީސުލްޖުމްހޫރިއްޔާ ބައްލަވާލައްވަމުން، މިމަސައްކަތް ވަރަށް އިޚްލާޞްތެރިކަމާއެކު ކޮށްދެއްވި އެއޮފީހުގެ ސީނިއަރ ޕްރޮޖެކްޓް ޑިރެކްޓަރ އާމިނަތު ޝަރީފަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިފަތްކޮޅުތަކުން ރާއްޖޭގެ ތާރީޚުގެ ވަރަށް މުހިންމު ބައެއް ސާފުވެގެންދާ ކަމަށް ވިދާޅުވެ، މިފަތްކޮޅުތަކުގެ މައްޗަށް ވަރަށް ތަފްޞީލުކޮށް ބައްލަވާލެއްވިއެވެ. އަދި މިއަދު މިފަތްކޮޅުތައް ފެންނަންހުރި އެންމެބޮޑު ސަބަބަކީ، ރާއްޖޭގެ ރަސްރަސްކަލުން ދިވެހިރާއްޖޭގެ ހުރިހާ މިލްކިއްޔާތެއްގައި ހުރި ތަކެތި ވަކިވަކިން ލިސްޓް ކުރައްވައި، އެކަންކަން ސާފުކޮށް ބަލަހައްޓަވަމުން ގެންދެވުން ކަމުގައިވެސް ވިދާޅުވިއެވެ.
ފަތްކޮޅުތަކާބެހޭ ކެޓަލޮގް ޙަވާލުކުރެއްވި ކަމުގެ ލިޔުމުގައި ރައީސުލްޖުމްހޫރިއްޔާގެ އޮފީހުން ސޮއިކުރެއްވީ، ސީނިއަރ ޕްރޮޖެކްޓް ޑިރެކްޓަރ އާމިނަތު ޝަރީފެވެ. ޑިޕާޓްމަންޓް އޮފް ހެރިޓޭޖުގެ ފަރާތުން އެފަތްކޮޅުތަކާ ޙަވާލުވެވަޑައިގެން، ލިޔުމުގައި ސޮއިކުރެއްވީ، ޤައުމީ ދާރުލްއާޘާރުގެ ޑިރެކްޓަރ ޢަލީ ވަޙީދެވެ.
މިރަސްމިއްޔާތު ތަޢާރުފު ކުރެއްވީ، މިނިސްޓަރ އޮފް ސްޓޭޓް ފޮރ ޓޫރިޒަމް، އާޓްސް އެންޑް ކަލްޗަރ އަޙްމަދު ނަޞީރެވެ.
