މާލޭ އިންޓަރނޭޝަނަލް އެއަރޕޯޓު ތަރައްޤީކޮށް ހިންގުން މެލޭޝިޔާ އެއަރޕޯޓްސް ހޯލްޑިންގ އާއި ޖީ.އެމް.އާރ. ގްރޫޕާ ހަވާލުކުރެއްވުމަށް ސަރުކާރުން ނިންމެވި ނިންމެވުން ބަލައިގަންނަކަން، ވާރލްޑް ބޭންކް ގްރޫޕްގެ ބައެއްކަމުގައިވާ އިންޓަރނޭޝަނަލް ފައިނޭންސް ކޯޕަރޭޝަން، އައި.އެފް.ސީ.އިން ހާމަކޮށްފިއެވެ.
މާލޭ އިންޓަރނޭޝަނަލް އެއަރޕޯޓް ތަރައްޤީކޮށް ހިންގުން ހަވާލުކުރައްވާނެ އެކަށީގެންވާ ފަރާތެއް ހޯއްދެވުމަށް ވޭތުވެދިޔަ 18 މަސްދުވަހު ސަރުކާރުން ކުރެއްވި މަސައްކަތުގެ ލީޑް ޓްރާންސްއެކްޝަން އެޑްވައިޒަރަކީ އައި.އެފް.ސީ.އެވެ.
އައި.އެފް.ސީ.ން ބުދަ ދުވަހު ނެރުއްވި ނޫސްބަޔާނެއްގައި ބައިނަލްއަޤްވާމީ، ދެފުށްފެންނަ އަދި ވާދަވެރި ބީލަމެއް ކުރިއަށް ގެންދިޔުމުގައި، ދިވެހި ސަރުކާރާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި، ސިވިލް އޭވިއޭޝަން ޑިޕާޓްމަންޓާއެކު އައި.އެފް.ސީ.ން މަސައްކަތް ކޮށްފައިވާނެ ކަމުގައި ބުނެފައިވެއެވެ.
"މާލޭ އިންޓަރނޭޝަނަލް އެއަރޕޯޓް އިތުރަށް ތަރައްޤީކޮށް ޒަމާނީ ކުރުމަށް އެކަށީގެންވާ އިންވެސްޓަރަކު ހޯދުމުގައި ދިވެހި ސަރުކާރަށް އެހީތެރިވުމަށް އައި.އެފް.ސީ.ން ކުރަމުންދިޔަ މަސައްކަތް މިވަނީ ނިމިފައި. ބީލަން ކާމިޔާބު ކުރިފަރާތުން އެއަރޕޯޓްގެ ޢިމާރާތާއި އެހެނިހެން ވަސީލަތްތައް ތަރައްޤީކޮށް، ދެވޭ ޚިދުމަތުގެ ފެންވަރުގެ ރަނގަޅުކޮށް، ރާއްޖޭގެ ޓުއަރިޒަމް އިތުރަށް ކުރިއަރުވައިދޭނެ"، އައި.އެފް.ސީ.ގެ ނޫސްބަޔާނުގައިވެއެވެ.
"ރާއްޖޭގެ ޓުއަރިޒަމް އިންޑަސްޓްރީ ދެމެހެއްޓުމަށްޓަކައި، މާލޭ އިންޓަރނޭޝަނަލް އެއަރޕޯޓަށް ބޮޑެތި ޢުމްރާނީ ކުރިއެރުންތަކެއް ވަރަށް އަވަހަށް ބޭނުންވޭ. ޓޫރިޒަމް އިންޑަސްޓްރީއަކީ ރާއްޖޭގެ އިޤްތިޞާދުގައި އެންމެ ބޮޑު ޙިއްޞާއެއް އަދާކުރާ ދާއިރާ ކަމުގައިވާއިރު، އެއަރޕޯޓް އިތުރަށް ތަރައްޤީކުރުމަށް ކުރެވިފައިވާ ޕްލޭނަކީ، ޓޫރިޒަމް އިންޑަސްޓްރީ އިތުރަށް ފުޅާކުރުމަށް ކޮންމެހެން މުހިންމު މަސައްކަތެއް" އައި.އެފް.ސީ.ގެ ނޫސްބަޔާނުގައިވެއެވެ.
ޕްރައިވެޓް އިންވެސްޓަރުން ތަޢާރަފް ކުރުމަށް ހަމަޖެހިފައިވާ ހިންގުމުގެ ދާއިރާގެ ބައިނަލްއަޤްވާމީ ހުނަރުތަކާއި، ބެސްޓް ޕްރެކްޓިސްގެ ސަބަބުން، އެއަރޕޯޓުގެ ޙިއްސާދާރުންނާއި، އެއަރޕޯޓްގެ ޚިދުމަތް ހޯދާ ފަރާތްތަކާއި، މުވައްޒަފުންގެ ޙައްޤުތައް ޙިމާޔަތް ކުރުމާއެކު، އެއަރޕޯޓް އެންމެ މަތީފެންވަރުގައި ހިންގޭނެ ކަމުގައިވެސް އައި.އެފް.ސީ.އިން ބުނެފައިވެއެވެ.
އައި.އެފް.ސީ.ގެ ނޫސްބަޔާނުގައި، އެއަރޕޯޓު ތަރައްޤީ ކުރުމަށްޓަކައި އިންވެސްޓްމަންޓް ހޯދުމަށް ކުރެވުނު މަސައްކަތް ކުރިއަށް ގެންދެވިފައިވަނީ ހުޅުވާލެވިފައިވާ، އަމާނާތްތެރި، ދެފުށްފެންނަ، އަދި ވާދަވެރިގޮތެއްގައިކަން ފާހަގަކޮށްފައިވާ ކަމުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ އެޑްވައިޒަރ އޮން އިންވެސްޓްމަންޓްސް މިފްޒާލް އަޙްމަދު ވިދާޅުވިއެވެ.
"މި މަސައްކަތް ކުރިއަށް ގެންދެވިފައިވާގޮތާމެދު ވަރަށް ހިތްހަމަޖެހޭ. މި މަސައްކަތް ފެށިގެން ނިމެންދެންވެސް ކުރިއަށް ގެންދެވިފައިވަނީ ބައިނަލްއަޤްވާމީ މިންގަނޑުތަކާއި، ބެސްޓް ޕްރެކްޓިސްއަށް ޙުރުމަތްތެރިކޮށް ހިތުމާއެކު. މި އެއަރޕޯޓްގެ ސަބަބުން ރާއްޖެ އަންނަ ފްލައިޓްތަކުގެ ޢަދަދު އިތުރުވެ، އެއަރޕޯޓް ތޮއްޖެހުން ކުޑަވެ، އެއަރޕޯޓް ޗެކް އިންއަށް ހިނގާ ވަގުތު ކުޑަވެގެންދާނެ. އާ އެއަރޕޯޓް ޓަރމިނަލްގައި، އިތުރު ފިހާރަތަކާއި، ކެފޭއާއި ރެސްޓޯރަންޓްފަދަ ތަންތަން ހުންނާނެ. އަދި މިއެއަރޕޯޓް ނިމިގެންދާއިރު، ހުޅުމާލޭގައި އުޅޭ ރައްޔިތުންނަށް ކުޑަވަގުތުކޮޅެއްގެ ތެރޭގައި އެއްގަމު މަގުން އެއަރޕޯޓަށް އާދެވޭނެ." މިފްޒާލް ވިދާޅުވިއެވެ.
އައި.އެފް.ސީ.ން މީގެ ކުރިންވަނީ ޖޯޑަންގެ ކްއީން އަލިއާ އިންޓަރނޭޝަނަލް އެއަރޕޯޓާއި، ސަޢޫދީ ޢަރަބިޔާގެ ކިންގް ޢަބްދުލްޢަޒީޒް އިންޓަރނޭޝަނަލް އެއަރޕޯޓް ހިންގުން ހަވާލުކުރާނެ އަމިއްލަ ފަރާތެއް ހޯދުމަށް ކުރެވުނު މަސައްކަތުގައި އެޤައުމުތަކަށް އެހީތެރިވެދީފައެވެ.
