ޗައިނާއާއި ރާއްޖެއާ ދެމެދު ވިޔަފާރިއާއި އިންވެސްޓްމަންޓުގެ ރޮނގުން ގުޅުން ބަދަހިކުރުމުގެ ގޮތުން ޗައިނާ-މޯލްޑިވްސް ބިޒިނަސް ފޯރަމެއް އިއްޔެ ޗައިނާގެ ޝެންހާއީގައި ބާއްވައިފިއެވެ.
ޗައިނާގައި ހުންނަ ދިވެހިރާއްޖޭގެ އެމްބަސީއާއި ޗައިނާ ކައުންސިލް ފޮރ ދަ ޕްރޮމޯޝަން އޮފް އިންޓަރނޭޝަނަލް ޓްރޭޑް (ސީ.ސީ.ޕީ.އައި.ޓީ.) ޝަންގހާއީ އާ ގުޅިގެން ބޭއްވުނު މި ފޯރަމްގައި ރާއްޖޭގެ ތަރައްޤީއަށް މުހިންމު ދާއިރާތަކުން، ޗައިނާގެ އަމިއްލަ ވިޔަފާރިވެރިންގެ 23 ފަރާތަކުން ބައިވެރިވިއެވެ. މީގެތެރޭގައި ޢިމާރާތްކުރުމާއި، މަސްވެރިކަމާއި، ދަތުރުފަތުރުކުރުމާއި ފަތުރުވެރިކަމުގެ ދާއިރާއިން ބޮޑެތި ކުންފުނިތައް ހިމެނެއެވެ.
މި ފޯރަމްގައި ސްޕެޝަލް އެންވޯއި އޮފް ދަ ޕްރެޒިޑެންޓް އިބްރާހީމް ޙުސައިން ޒަކީއާއި، މިނިސްޓަރ އޮފް ފޮރިން އެފެއާރޒް ޑޮކްޓަރ އަޙްމަދު ޝަހީދާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ރަޝީދު ވާހަކަފުޅު ދެއްކެވިއެވެ. އަދި ރާއްޖޭގައި އިންވެސްޓްކުރުމަށް ހުރި ފުރުޞަތުތަކާއި ރާއްޖޭގައި އިންވެސްޓު ކުރުމުގެ މާޙައުލު އޮތް ގޮތާބެހޭ މަޢުލޫމާތު އެކުލެވޭ ޕްރެޒެންޓޭޝަނެއްވެސް މިފޯރަމްގައި ހުށަހެޅިއެވެ.
