ޗައިނާގެ ޝެންގހާއީގައި ހުންނަވާ ރާއްޖޭގެ އޮނަރަރީ ކޮންސަލް މިސްޓަރ ޔާންގް ގުއިޝެންގ، ވިލިނގިލީގައި ހުންނަ "ކުޑަކުދިންގެ ހިޔާ"އަށް ވިހިހާސް ޑޮލަރުގެ އެހީއެއް ދެއްވައިފިއެވެ. މި އެހީއާ ރާއްޖޭގެ ފަރާތުން ޙަވާލުވެވަޑައިގަތީ ރައީސުލްޖުމްހޫރިއްޔާގެ އަނބިކަނބަލުން ލައިލާ ޢަލީއެވެ.
ރައީސުލްޖުމްހޫރިއްޔާގެ ދެކަނބަލުން ޝެންގހާއީގައި ތިއްބަވާ ހޮޓަލުގައި އޮތް ރަސްމިއްޔާތެއްގައި، މި އެހީއާ ހަވާލުވެވަޑައިގަތުމަށްފަހު، ރައީސުލްޖުމްހޫރިއްޔާގެ އަނބިކަނބަލުން ލައިލާ ޢަލީ ދެއްކެވި ވާހަކަފުޅުގައި، މިއީ "ކުޑަކުދިންގެ ހިޔާ"އަށް ވަރަށް ބޮޑަށް ބޭނުންވެފައިވާ އެހީއެއްކަން ފާހަގަކުރައްވައި، މި އެހީދެއްވިކަމަށްޓަކައި މިސްޓަރ ޔާންގް ގުއިޝެންގއަށް ވަރަށް އިޚްލާޞްތެރިކަމާއެކު ޝުކުރު އަދާކުރެއްވިއެވެ.
ޝެންގހާއީގައި ހުންނަވާ ރާއްޖޭގެ އޮނަރަރީ ކޮންސަލް މިސްޓަރ ޔާންގް ގުއިޝެންގްއާއި، ހޮންކޮންގގައި ހުންނަވާ ރާއްޖޭގެ އޮނަރަރީ ކޮންސަލް ޖެނެރަލް މިސްޓަރ ބޮބް އެން. ހަރުލޭލާއާ ރައީސުލްޖުމްހޫރިއްޔާ މިދަތުރުފުޅުގައި އިއްޔެ ބައްދަލުކުރެއްވިއެވެ. މި ބައްދަލުކުރެއްވުމުގައި، އޮނަރަރީ ކޮންސަލުން ދެއްކެވި ވާހަކަފުޅުގައި، ރާއްޖެއާއި އެބޭފުޅުން ތިއްބަވާ ޤައުމުތަކުގެ މެދުގައި އޮންނަ ގުޅުމާއި، ރާއްޖެއާއި އެޤައުމުތަކާ ދެމެދު އޮންނަ ވިޔަފާރިއާއި، އިޤްތިޞާދީ ގުޅުން އިތުރަށް ބަދަހި ކުރެއްވުމަށް ވަރަށް މުހިންމު މަސައްކަތްތަކެއް ކުރެއްވިދާނެ ކަމުގައި ވިދާޅުވިއެވެ.
