ޑައިބެޓީސް ސޮސައިޓީ އޮފް މޯލްޑިވްސްގެ 10ވަނަ އަހަރީ ދުވަސް ފާހަގަކުރުމުގެ ގޮތުން އެސޮސައިޓީގެ ފަރާތުން ރޭ ދަރުބާރުގޭގައި ބޭއްވި ޙަފްލާ، ނައިބު ރައީސް ޑޮކްޓަރ މުޙަންމަދު ވަޙީދު ޝަރަފުވެރިކޮށްދެއްވައިފިއެވެ.
މި ޙަފްލާ ޝަރަފުވެރިކޮށްދެއްވައި ނައިބު ރައީސް ދެއްކެވި ވާހަކަފުޅުގައި، ވޭތުވެދިޔަ 10 އަހަރު ދުވަހުގެ ތެރޭގައި ޑައިބެޓީސްއާ ބެހޭގޮތުން ދިވެހިން ހޭލުންތެރި ކުރުމަށާއި، އެބަލި ޖެހިފައިވާ މީހުންނަށް ދުޅަހެޔޮ ޞިއްޙަތެއްގައި ދުވަސްތައް ވޭތުކުރުމުގެ މަގު ފަހިކޮށްދެއްވުމަށް އެ ސޮސައިޓީން ކޮށްފައިވާ މަސައްކަތްތައް ފާހަގަކުރެއްވިއެވެ. އަދި އެ ސޮސައިޓީއަކީ ރާއްޖޭގައި އުފެދިފައިވާ މިފަދަ އެހެން މަދަނީ ޖަމްޢިއްޔާތަކަށް ނަމޫނާއެއް ކަމުގައި ވިދާޅުވިއެވެ.
ޑައިބެޓީސްއާއި އަދި ދިރިއުޅުމަށް އަންނަ ބަދަލުތަކުގެ ސަބަބުން ކުރިމަތިވާ ނުރައްކާތެރި ބަލިތައް ޖެހުން ރާއްޖޭގައި އިތުރުވަމުންދާއިރު، ރައްޔިތުންގެ ޞިއްޙަތު ދުޅަހެޔޮކޮށް ބެހެއްޓުމަށް ބޭނުންވާ މަޢުލޫމާތަކީ، ކޮންމެ މީހަކަށްވެސް އެނގެންޖެހޭނެ މަޢުލޫމާތެއް ކަމުގައި ނައިބު ރައީސް ވިދާޅުވިއެވެ. މީގެ އިތުރުން، ދިރުއުޅުމަށް އަންނަ ބަދަލުތަކުގެ ސަބަބުން ކުރިމަތިވާ ބަލިތަކުން ރައްކާތެރިވެ ތިބުމަށްޓަކައި ކަސްރަތުކޮށް، އަމާންކަމާއެކު ޙަރަކާތެރިވެ އުޅެވޭނެ ގޮތަކަށް ދިރުއުޅުމުގެ މާޙައުލު ބައްޓަންވެފައި ހުރުމުގެ މުހިންމު ކަމުގެ މައްޗަށްވެސް ނައިބު ރައީސް ޑޮކްޓަރ ވަޙީދުގެ ވާހަކަފުޅުގައި އަލިއަޅުއްވާލެއްވިއެވެ.
ޑައިބެޓީސް ސޮސައިޓީ އޮފް މޯލްޑިވްސްއަކީ، ޑައިބެޓިކް ބަލިމީހުންނަށް ދުޅަހެޔޮ ޞިއްޙަތެއްގައި ދިރިއުޅުން ވޭތުކުރުމުގެ މަގު ފަހިކޮށްދީ އެކަމުގެ މަޢުލޫމާތު ފޯރުވައިދީ، އަދި ޑައިބެޓީސްއާމެދު ރައްޔިތުންގެ މެދުގައި ހޭލުންތެރިކަން އިތުރުކުރުމުގެ މަޤްޞަދުގައި އުފައްދާފައިވާ ޖަމްޢިއްޔާއެކެވެ.
އެނގިވަޑައިގަންނަވާނެފަދައިން ޞިއްޙީ ހޭލުންތެރިކަން އިތުރުކުރުމުގެ ރޮނގުން ހިތްވަރުދިނުމުގެ ޤައުމީ އިނާމު، މިދިޔަ އަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި، ޑައިބެޓީސް ސޮސައިޓީ އޮފް މޯލްޑިވްސްއަށް ސަރުކާރުންވަނީ ދެއްވާފައެވެ.
