16 ވަނަ ސާކު ސަމިޓްގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ މުޙަންމަދު ނަޝީދާއި، އެމަނިކުފާނުގެ އަނބިކަނބަލުން ބޫޓާނުގެ ތިމްޕޫއަށް ކުރެއްވި ދަތުރުފުޅު ނިންމަވާލެއްވުމަށްފަހު، ޗައިނާއަށް ކުރައްވާ ދަތުރުފުޅުގައި މިއަދު މެންދުރެއްހާއިރު ފުރާވަޑައިގެންފިއެވެ.
ރައީސުލްޖުމްހޫރިއްޔާ ބޫޓާނަށް ކުރެއްވި ދަތުރުފުޅުގައި ސާކު ސަމިޓްގައި ބައިވެރިވެވަޑައިގެންނެވުމުގެ އިތުރަށް، ސާކުގެ މެންބަރު ހުރިހާ ޤައުމެއްގެ އިސްވެރިންނާ ބައްދަލުކުރެއްވިއެވެ. މިބައްދަލުކުރެއްވުންތަކުގައި ރާއްޖެއާ އެޤައުމުތަކާ ދެމެދުގައިވާ ގުޅުން އިތުރަށް ބަދަހިކުރެއްވުމާއި، މޫސުމަށް އަންނަ ބަދަލުތަކާއި، ސާކު އިތުރަށް ހަރުދަނާ ކުރެއްވުމާ ބެހޭގޮތުން މަޝްވަރާ ކުރެއްވިއެވެ.
ރައީސުލްޖުމްހޫރިއްޔާ ޗައިނާއަށް މިކުރައްވާ ދަތުރުފުޅުގައި، ރާއްޖެއާއި ޗައިނާއާ ދެމެދުގައި ރަސްމީ ވާހަކަފުޅުތައް ބާއްވަވައި، ޗައިނާގެ ވިޔަފާރިވެރިންނާ ބައްދަލުކުރައްވާނެއެވެ. އަދި ޝަންގހާއީ ވޯލްޑް އެކްސްޕޯގައި ހުރި ރާއްޖޭގެ ޕެވިލިއަން ހުޅުއްވައިދެއްވާނެއެވެ.
ރައީސުލްޖުމްހޫރިއްޔާގެ ދެކަނބަނލުން ޗައިނާއަށް ވަޑައިގަންނަވާނީ މާދަމާއެވެ.
