ރައީސުލްޖުމްހޫރިއްޔާ މުޙަންމަދު ނަޝީދު، މާދަމާ ބޫޓާގެ ތިމްޕޫގައި ފެށޭ 16 ވަނަ ސާކް ސަމިޓްގައި ބައިވެރިވެވަޑައިގަތުމަށް ބޫޓާނަށް ޒިޔާރަތް ކުރައްވަމުން ގެންދަވާ ސާކު ޤައުމުތަކުގެ އިސްވެރިންނާ ބައްދަލު ކުރައްވަމުން އެބަގެންދަވައެވެ. މިގޮތުން އެމަނިކުފާނު މިއަދު، ނޭޕާލުގެ ބޮޑުވަޒީރު މަދަވް ކުމާރު ނެޕޯލާއި، ބަންގްލަދޭޝްގެ ބޮޑުވަޒީރު ޝައިޚް ޙަސީނާއާއި، ސްރީލަންކާގެ ރައީސް މަހިންދަ ރާޖަޕްކްސައާ ބައްދަލުކުރެއްވިއެވެ.
ވަކި ވަކިން ބޭއްވެވި މިބައްދަލު ކުރެއްވުންތަކުގައި، މައިގަނޑު ގޮތެއްގައި މަޝްވަރާ ކުރެއްވީ މޫސުމަށް އަންނަ ބަދަލުތަކާބެހޭ ގޮތުންނެވެ. މިގޮތުން މޫސުމަށް އަންނަ ބަދަލުތައް ޙައްލު ކުރުމާބެހޭގޮތުން ދުނިޔޭގެ ފެންވަރުގައި ކުރިއަށްދާ ބަހުސްތަކުގައި ސާކުގެ ހުރިހާ ޤައުމުތަކުން އެއް ވިސްނުމަކަށް އައުމުގެ މުހިންމު ކަމުގެ މައްޗަށް ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ.
މީގެ އިތުރުން މިފަހަރުގެ ސާކް ސަމިޓަކީ ނަތީޖާ ނެރެވޭ ސަމިޓަކަށް ހެއްދެވުމާއި، ސާކުގެ ޤައުމުތަކުގެ މެދުގައި އިތުރަށް ގުޅުން ބަދަހިކުރުމާއި، އިތުރު ދާއިރާތަކަށް ސާކުގެ ޙަރަކާތްތައް ފުޅާކުރުމާބެހޭގޮތުން ރައީސުލްޖުމްހޫރިއްޔާ، ނޭޕާލާއި، ބަންގްލަދޭޝްއާއި، ސްރީލަންކާގެ ވެރިންނާއެކު މަޝްވަރާކުރެއްވިއެވެ. އަދި އެޤައުމުތަކާއި ރާއްޖެއާ ދެމެދު އޮންނަ ގުޅުމާއި މިގުޅުން އިތުރަށް ބަދަހި ކުރެއްވުމާ ބެހޭގޮތުން މަޝްވަރާކުރެއްވިއެވެ.
ރައީސުލްޖުމްހޫރިއްޔާ ނޭޕާލުގެ ބޮޑުވަޒީރު މަދަވް ކުމާރު ނެޕޯލާ ބައްދަލުކުރެއްވީ ބޫޓާނުގައި ހުންނަ ސާކް ވިލެޖްގައި ރައީސުލްޖުމްހޫރިއްޔާ ހުންނެވުމަށް ޚާއްޞަ ކުރެވިފައިވާ "މޯލްޑިވްސް ހައުސް"ގައި މިއަދު ހަވީރުއެވެ.
މި ބައްދަލުކުރެއްވުމުގައި މޫސުމަށް އަންނަ ބަދަލުތަކާ ދެކޮޅަށް ނޭޕާލުން ކުރަމުން ގެންދާ މަސައްކަތްތަކާ ބެހޭގޮތުން ނޭޕާލުގެ ބޮޑުވަޒީރު، ރައީސުލްޖުމްހޫރިއްޔާއަށް މަޢުލޫމާތު ދެއްވިއެވެ. އަދި ނޭޕާލުގައި އިއާދަ ކުރަނިވި ހަކަތައިގެ މަޝްރޫޢުތައް ހިންގުމުގެ ފުރުޞަތު އެބަހުރި ކަމަށާއި، މިފަދަ މަޝްރޫޢުތަކަށް އިންވެސްޓްމަންޓްތައް ގެނައުމަށް އޮތް އެންމެ ބޮޑު ހުރަހަކީ އެތެރޭގެ މައްސަލަތައް ކަމުގައި ވިދާޅުވިއެވެ.
މި ބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޤައުމުގެ އެތެރޭގެ މައްސަލަތަކުގެ އެންމެބޮޑު ސަބަބަކީ ފަޤީރުކަން ކަން ފާހަގަ ކުރައްވަމުން، ފަޤީރުކަން ނައްތާލުމަށްޓަކައި ފަޤީރު ސަރަޙައްދުތަކުގައި ކުރެވޭ އިންވެސްޓްމަންޓްތައް އިތުރުކޮށް އެފަދަ ސަރަޙައްދުތަކުގައި ހުރި ފުރުޞަތުތައް އިތުރު ކުރުމުގެ މުހިންމު ކަމުގެ މައްޗަށް ވާހަކަފުޅު ދެއްކެވިއެވެ.
ރައީސުލްޖުމްހޫރިއްޔާ ބަންގްލަދޭޝްގެ ބޮޑުވަޒީރާ ބައްދަލުކުރައްވައި ދެއްކެވި ވާހަކަފުޅުގައި، ޚާއްޞަ ގޮތެއްގައި ރާއްޖޭގެ ހެލްތް އިންޝުއަރެންސް ސްކީމާ ބެހޭގޮތުން ބޮޑުވަޒީރު ޝެއިޚް ޙަސީނާއަށް މަޢުލޫމާތު ދެއްވިއެވެ. އަދި މި ސްކީމް އިތުރަށް ފުރިހަމަ ކުރެއްވުމަށް، ބަންގްލަދޭޝްގެ ތަޖުރިބާ ޙިއްސާ ކުރުމާބެހޭގޮތުން މަޝްވަރާ ކުރެއްވިއެވެ.
މި ބައްދަލުކުރެއްވުންވެސް އޮތީ ސާކް ވިލެޖުގައި ރައީސުލްޖުމްހޫރިއްޔާ ހުންނަވާ "މޯލްޑިވްސް ހައުސް"ގައި މިއަދު ހަވީރުއެވެ.
ރައީސުލްޖުމްހޫރިއްޔާ މުޙަންމަދު ނަޝީދު، ސްރީލަންކާގެ ބޮޑުވަޒީރު މަހިންދަ ރާޖަޕަކްސައާ ބައްދަލުކުރެއްވީ ސާކް ވިލެޖްގައި ސްރީލަންކާގެ ރައީސް ހުންނެވުމަށް ޚާއްޞަ ކުރައްވާފައިވާ "ސްރީލަންކާ ހައުސް"ގައި މިރޭ އިރާކޮޅުގެ ވަގުތެއްގައެވެ.
މި ބައްދަލުކުރެއްވުމުގައި ރާއްޖެއާއި ސްރީލަންކާއާ ދެމެދު މަސްވެރިކަމުގެ ދާއިރާއިން އިތުރަށް ގުޅުން ބަދަހިކުރެއްވުމާ ބެހޭގޮތުން މަޝްވަރާ ކުރެއްވިއެވެ. މީގެ އިތުރުން ރާއްޖެއާ، ސްރީލަންކާއާއި، އިންޑިޔާއާ ދެމެދު ފަސޭހައިން ކަނޑުމަގުން ދަތުރުކުރުވޭނެ ނިޒާމެއް ޤާއިމް ކުރުމުގެ މުހިންމު ކަމާބެހޭގޮތުން ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ.
ސްރީލަންކާގެ ރައީސް ދެއްކެވި ވާހަކަފުޅުގައި، ސްރީލަންކާގެ މިހާރުގެ މަސްރަހާބެހޭ މަޢުލޫމާތު، މިބައްދަލުކުރެއްވުމުގައި ރައީސުލްޖުމްހޫރިއްޔާއަށް އެރުއްވިއެވެ.
މި ބައްދަލުކުރެއްވުން ތަކުގައި ރައީސުލްޖުމްހޫރިއްޔާގެ އަރިހުގައި ސްޕްޝަލް އެންވޯއީ އޮފް ދަ ޕްރެޒިޑެންޓް އިބްރާހީމް ޙުސައިން ޒަކީއާއި، މިނިސްޓަރ އޮފް ފޮރިން އެފެއާޒް ޑޮކްޓަރ އަޙްމަދު ޝަހީދާއި، ރާއްޖެއިން އިންޑިޔާއަށް ކަނޑައަޅުއްވާފައި ހުންނަވާ ސަފީރު ޢަބްދުލްޢަޒީޒް ޔޫސުފް ބައިވެރިވެވަޑައިގެންނެވިއެވެ.
