ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، މިނިސްޓްރީ އޮފް ޓުއަރިޒަމް، އާޓްސް އެންޑް ކަލްޗަރ ދަށުން ހިނގަމުންދިޔަ "ދިވެހި ބަހާއި ތާރީޚަށް ޚިދްމަތްކުރާ ޤައުމީ މަރްކަޒު" މިއަދުން ފެށިގެން ރައީސުލްޖުމްހޫރިއްޔާ މުޙަންމަދު ނަޝީދު އުވާލައްވައިފިއެވެ.
ދިވެހި ބަހާއި ތާރީޚަށް ޚިދްމަތްކުރާ ޤައުމީ މަރްކަޒު އުވާލެއްވުމާގުޅިގެން، އެ މަރްކަޒުން ބަލަހައްޓަވަމުން ގެންދެވި މަސައްކަތްތަކުގެ ތެރެއިން، ތަރިކައާއި، ދިވެހި އާދަކާދައާއި ޘަޤާފަތާގުޅޭ ގޮތުން ކުރައްވަމުން ގެންދެވި މަސައްކަތްތައް، މިއަދުން ފެށިގެން މިނިސްޓްރީ އޮފް ޓުއަރިޒަމް، އާޓްސް އެންޑް ކަލްޗަރ ކުރައްވަމުންދަވާގޮތަށް ވަނީ ހަމަޖައްސަވާފައެވެ.
މިގޮތުން، އެމަރްކަޒުން ބަލަހައްޓަވަމުން ގެންދެވި، ޤައުމީ ދާރުލްއާޘާރާއި، ބޮޑުތަކުރުފާނުގެ ހަނދާނީ މަރްކަޒު، މިއަދުން ފެށިގެން ބަލަހައްޓަވަމުން ގެންދަވާނީ ވެސް މިނިސްޓްރީ އޮފް ޓުއަރިޒަމް، އާޓްސް އެންޑް ކަލްޗަރއިންނެވެ.
މީގެއިތުރުން، އަރުޝީފުކުރުމާ ގުޅޭގޮތުން އެ މަރްކަޒުން ކުރައްވަމުން ގެންދެވި މަސައްކަތްތައް، އެ މިނިސްޓްރީގެ ދަށުން ހިނގަމުންދާ ޤައުމީ އަރުޝީފުން ކުރައްވަމުންގެންދަވާ ގޮތަށް ވެސް ވަނީ ހަމަޖައްސަވައިފިއެވެ.
އަދި އެމަރުކަޒުން ކުރައްވަމުން ގެންދެވި ދިވެހި ބަހާއި ތާރީޚާބެހޭ ދިރާސާގެ މަސައްކަތްތައް، މިނިސްޓްރީ އޮފް އެޑިޔުކޭޝަންގެ ދަށުން ހިނގަމުންދާ މޯލްޑިވްސް ކޮލެޖް އޮފް ހަޔަރ އެޑިޔުކޭޝަނުން ކުރައްވަމުން ގެންދަވާގޮތަށް ވަނީ ހަމަޖައްސަވާފައެވެ.
ދިވެހި ބަހާއި ތާރީޚަށް ޚިދްމަތްކުރާ ޤައުމީ މަރްކަޒު އުވާލައްވައި، އެތަނުން ކުރައްވަމުން ގެންދެވި މަސައްކަތްތައް އަލުން ހަމަޖެއްސެވުމުގެ ބޭނުމަކީ، އެމަރްކަޒުން ކުރައްވަމުންގެންދެވި މަސައްކަތްތައް މިހާރަށްވުރެ ފުޅާކޮށް، އެ މަސައްކަތްތައް ދެމެހެއްޓެނިވި ގޮތެއްގައި ކުރެއްވޭނެ އިންތިޒާމެއް ހަމަޖެއްސެވުމެވެ.
