ރައީސުލްޖުމްހޫރިއްޔާ މުޙަންމަދު ނަޝީދާއި އެމަނިކުފާނުގެ އަނބިކަނބަލުން ލައިލާ ޢަލީ، 16 ވަނަ ސާކް ސަމިޓުގައި ބައިވެރިވެވަޑައިގަތުމަށް ބޫޓާނަށް ކުރައްވާ ދަތުރުފުޅެއްގައާއި، ޗައިނާއަށް ކުރައްވާ ފުރަމާނަ ދަތުރުފުޅެއްގައި މިއަދު ހެނދުނު ފުރާވަޑައިގެންފިއެވެ.
16ވަނަ ސާކް ސަމިޓް ބޭއްވުމަށް ހަމަޖެހިފައިވަނީ، މި އެޕްރީލް މަހުގެ 28ން 29އަށް ބޫޓާނުގެ ތިމްޕޫގައެވެ. ރައީސުލްޖުމްހޫރިއްޔާ ސާކް ސަމިޓްގައި ތަޤުރީރު ކުރައްވާނެއެވެ. މީގެއިތުރުން، މި ސަމިޓްގެ ހަވާސާގައި، ސާކުގެ ބައެއް ޤައުމުތަކުގެ އެންމެ އިސްވެރިންނާ ބައްދަލުކުރައްވައި، ރާއްޖެއާއި އެޤައުމުތަކާ ދެމެދު އޮންނަ ގުޅުން އިތުރަށް ބަދަހިކުރެއްވުމާއި، އަދި ސަރަޙައްދީ މައްސަލަތަކާ ބެހޭގޮތުން މަޝްވަރާ ކުރައްވާނެއެވެ.
މިދަތުރުފުޅުގައި ފުރާވަޑައިގަތުމުގެ ކުރިން، މާލޭ ރަސްމީ ފާލަމުގައި ރާއްޖޭގެ ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން، މި ސަމިޓްގެތެރޭގައި ސަރަޙައްދީ ކަންކަމުގައި ސާކުން އަދާކުރާ ދައުރު ހަރުދަނާ ކުރައްވައި އިތުރަށް ފުޅާކުރެއްވުމަށް މަސައްކަތް ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ދެކަނބަލުން ބޫޓާނަށް ކުރައްވާ ދަތުރުފުޅު ނިންމަވާލެއްވުމަށްފަހު، ފުރަމާނަ ދަތުރުފުޅެއްގައި ޗައިނާއަށް ވަޑައިގަތުމަށް ހަމަޖެހިފައިވަނީ، އަންނަ މެއި މަހުގެ 1 ވަނަ ދުވަހުއެވެ.
