ދިވެހި ސިފައިން، މިޤައުމަށާއި ރައްޔިތުންނަށްޓަކައި ރެޔާދުވާލު ކުރައްވަމުން ގެންދަވާ ބުރަ މަސައްކަތަށާއި، އުފުއްލަވަމުން ގެންދަވާ ޒިންމާއަށް ރައީސުލްޖުމްހޫރިއްޔާ މުޙަންމަދު ނަޝީދު ތަޢްރީފު ކުރައްވައިފިއެވެ.
ރައީސުލްޖުމްހޫރިއްޔާ، ސިފައިންގެ މަސައްކަތަށް ތަޢްރީފު ކުރައްވައި ވާހަކަފުޅު ދެއްކެވީ، 2010 ވަނަ އަހަރުގެ ސިފައިންގެ ދުވަސް ފާހަގަކުރުމުގެ ގޮތުން މިއަދު ހަވީރު ޖުމްހޫރީ މައިދާނުގައި ބޭއްވެވި ސިފައިންގެ އެންމެމަތީ ވެރިޔާ ސިފައިންގެ ފޯސް އަދި ފްލީޓް ރިވިއު ކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދައުލަތަށް ދިމާވި ކޮންމެ ބޮޑު ކަމެއްގައި ދިވެހި ސިފައިން އަދާކޮށްފައިވާ މުހިންމު ދައުރަށް ސާބަސް ރައްދު ކުރެއްވިއެވެ. އަދި ރާއްޖެ ދެކެމުންމިދާ ޑިމޮކްރެޓިކް ބަދަލުތައް ރާއްޖެއަށް ގެނައުމުގައި، ސިފައިން އަދާކުރެއްވި މުހިންމު ދައުރު އެމަނިކުފާނު ފާހަގަކުރެއްވިއެވެ.
ޤައުމެއްގެ ޙަޔާތުގައި ސިފައިންގެ ދައުރުގެ މައްޗަށް ވާހަކަފުޅު ދައްކަވަމުން، "ޤައުމީ ދިފާޢާއި، ޤައުމީ ސަލާމަތާއި، މަޞްލަޙަތު ދަމަހައްޓައި، ނަގަހައްޓައި، ޤައުމު ހަމަ މަގަށް ފައްތައި، ހިމުން ކުރުމުގައި ދިވެހި ސިފައިން އަދާކުރި، އަދާކުރަމުންދާ އަދި އަދާކުރަންޖެހޭ ދައުރު ވަރަށް މުހިންމު" ރައީސުލްޖުމްހޫރިއްޔާ ވިދާޅުވިއެވެ.
މިމޭރުމުން ވާހަކަފުޅު ދައްކަވަމުން، ޤައުމީ މަޞްލަޙަތު ހުރި ކަންކަމުގައި ސިޔާސީ ނުފޫޒާއި ވާދަވެރިކަމުން ދުރުހެލިވެ އެންމެން އެއްގޮތަކަށް ވިސްނައި، ވަކިފަރާތަކަށް ބެލުމެއްނެތި ޢަމަލު ކުރާނޭ ދައުލަތުގެ ބާރެއްގެ ގޮތުގައި ދުޅަހެޔޮ ޞިއްޙަތެއް ލިބިފައިވާ އަސްކަރިއްޔާއެއް އޮންނަނީ ކަމަކާނުލައެއް ނޫން ކަމުގައި އެމަނިކުފާނު ވިދާޅުވިއެވެ.
ސިފައިންގެ ޚިދްމަތް އިތުރަށް ފުރިހަމަކޮށް، ޒަމާނީ އަސްކަރިއްޔާއެއް ބިނާކުރުމުގެ ގޮތުން، މިހާރު ދިވެހި ސިފައިންވަނީ ލާމަރްކަޒު ކުރެވި، ރާއްޖޭގެ ހުރިހާ ސަރަޙައްދަކަށް ބަހާލެވިފައި ކަމުގައި ރައީސުލްޖުމްހޫރިއްޔާ ވިދާޅުވިއެވެ. ސިފައިންގެ ޚިދްމަތް، ލާމަރްކަޒުކުރުމުގެ ގޮތުން ރާއްޖެ، ހަތަރު ސަރަޙައްދަކަށް ބަހާލައި، އެހަތަރު ސަރަޙައްދުގައި މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް.)ގެ ކޮމާންޑްތައް މިހާރުވަނީ ޤާއިމު ކުރައްވާފައެވެ.
މީގެއިތުރުން، ޚިދްމަތަށް ފުރިހަމަކަން ގެނައުމަށްޓަކައި ބޭނުންވާ ޢުމްރާނީ ތަރައްޤީއާއި، ވަސީލަތްތައް ހޯދުމާއި، މީހުން ބިނާކުރުމާއި، ތަމްރީނު ކުރުމުގެ މަސައްކަތްތައް އެމް.އެން.ޑީ.އެފް.ގެ ފަރާތުން ކުރައްވަމުން ގެންދަވާ ކަމަށާއި، ކުރިމަގަށް އަމާޒުކުރެވޭ ހިންގުމުގެ ނިޒާމުތައް ސިފައިންގެ ވެރިން ގެންދަވަނީ ތަޢާރުފު ކުރައްވަމުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
"އަޅުގަނޑަށް ފެންނަނީ ވަރަށް ހުނަރުވެރި ޤާބިލް އަސްކަރިއްޔާއެއް، އެކަށޭނަ ގޮތެއްގައި ރާއްޖެއަށް އުފަންވަމުން އަންނަ މަންޒަރު". އެމަނިކުފާނު ވިދާޅުވިއެވެ.
ސިފައިންގެ އެންމެމަތީ ވެރިޔާގެ ފޯސް އަދި ފްލީޓް ރިވިއުއަކީ ދިވެހި އަސްކަރިއްޔާގެ ސަފުތަކުގެ ތަރުތީބުކަން ހުރި މިންވަރު ދެނެގަތުމަށާއި، އިންސާނީ ވަސީލަތްތައް ޤާއިމްވެފައިވާ މިންވަރާއި، މަސްއޫލިއްޔަތު އުފުލުމުގެ ގޮތުން ތައްޔާރުވެފައިވާ ގޮތާއި، ލަޝްކަރުގެ ސަފުތަކުގެ ބަދަހިކަން ދެނެގަތުމުގެ ގޮތުން ބޭއްވުނު ރިވިއުއެކެވެ. މިއީ މިފަދަ ގޮތަކަށް އެމް.އެން.ޑީ.އެފް.ގެ ފޯސް އަދި ފްލީޓް ރިވިއުއެއް ބޭއްވުނު ފުރަތަމަ ފަހަރެވެ.
މި ރަސްމިއްޔާތުގައި، އެމް.އެން.ޑީ.އެފް.ގެ މެރިންކޯއާއި، ކޯސްޓްގާޑްގެ ސިފައިންނާއި، އުޅަނދުފަހަރުތަކާއި ވަސީލަތްތައް ދައްކާލުން އޮތެވެ. އަދި އެމް.އެން.ޑީ.އެފް.ގެ ސްޕެޝަލް ފޯސަސްގެ ޙަރަކާތްތަކާއި، އެއަރ ވިންގއާއި، ފަޔަރ އެންޑް ރެސްކިއު ސަރވިސްގެ އުޅަނދުތައް ދައްކާލުންވެސް އޮތެވެ. މީގެއިތުރުން އެމް.އެން.ޑީ.އެފް.ގައި އަލަށް އުފެއްދެވި ސަރވިސް ކޯގެ ދިދަ، ރައީސުލްޖުމްހޫރިއްޔާ ސަރވިސް ކޯގެ ކޮމަޑާންޓް ބްރިގޭޑިއަރ ޖެނެރަލް އަޙްމަދު ނިލާމާ ޙަވާލުކޮށްދެއްވިއެވެ.
