ރައީސުލްޖުމްހޫރިއްޔާ މުޙަންމަދު ނަޝީދާއި އަނބިކަނބަލުން ލައިލާ ޢަލީ، ދެކުނު ކޮރެއާއަށް ކުރެއްވި ދަތުރުފުޅު ނިންމަވާލެއްވުމަށްފަހު، މިރޭ މާލެ ވަޑައިގެންފިއެވެ. މިދަތުރުފުޅުގައި "ޔޫ.އެން. ޗެމްޕިއަންސް އޮފް ދި އާރތް އެވޯޑް" ރައީސުލްޖުމްހޫރިއްޔާއާށް ލިބިވަޑައިގެންފައިވާތީ، ވަޒީރުންނާއި، ސަރުކާރުގެ އިސްބޭފުޅުންނާއި، ޢާންމު ރައްޔިތުންގެ ވަރަށް ގިނަ ޢަދަދެއްގެ ބަޔަކު، އެމަނިކުފާނަށް ވަރަށް ހޫނު މަރްޙަބާއެއް ދަންނަވައިފިއެވެ.
ރައީސުލްޖުމްހޫރިއްޔާއަށް މަރްޙަބާ ދެންނެވުމަށް ވަޒީރުންނާއި، ސަރުކާރުގެ އިސްބޭފުޅުން މާލޭ ބައިނަލްއަޤްވާމީ ވައިގެ ބަނދަރަށް ވަޑައިގެންނެވިއެވެ. އަދި އެމަނިކުފާނު މާލެ ވަޑައިގެންނެވިއިރު، ރަސްމީ ފާލަންދޮށަށް ރައްޔިތުންގެ މަޖިލީހުގެ ބައެއް މެންބަރުންނާއި ވަރަށްގިނަ ޢަދަދެއްގެ ރައްޔިތުން އެއްވެ، އެމަނިކުފާނަށް ވަރަށް ހޫނު މަރްޙަބާއެއް ދަންނަވަމުން ގެންދިޔައެވެ.
އެއްވެ ތިބި މީހުންނާ މުޙާޠަބު ކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި އަޅުގަނޑުމެންގެ ރާއްޖެއަށް މިލިބޭ ފަޙުރަކީ އެމަނިކުފާނަށް އެކަނި ލިބިވަޑައިގަންނަވާ ފަޙުރެއްނޫންކަމަށާއި، މިކަމުގައި ރާއްޖޭގެ ރައްޔިތުންގެ ޙިއްޞާވެސް ވަރަށް ބޮޑު ކަމުގައި ވިދާޅުވިއެވެ. އަދި މިއަދު މިފެންނަނީ ރާއްޖޭގެ އެންމެ ރައްޔިތުން އެކުގައި ކުރާ ވަރަށް ގިނަ މަސައްކަތްތަކެއްގެ ސަބަބުން ލިބެމުންއަންނަ ހެޔޮ ނަތީޖާ ކަމުގައިވެސް އެމަނިކުފާނު ވިދާޅުވިއެވެ.
ދުނިޔޭގެ މޫސުމަށް އަންނަ ނޭދެވޭ ބަދަލުތަކަކީ ރާއްޖޭގެ ތަރައްޤީއަށް ކުރިމަތިވެފައިވާ ވަރަށް ބޮޑު ހުރަހެއް ކަމަށާއި މިކަންކަމުން ސަލާމަތްވުމަށް އެހީތެރިކަން ރާއްޖެއަށް ބޭނުންވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
"ޔޫ.އެން. ޗެމްޕިއަންސް އޮފް ދި އާރތް އެވޯޑް" އަކީ، ދުނިޔޭގެ ސަލާމަތަށް، އެބޭފުޅުންގެ ދުރުވިސްނެވުމާއެކު، ދެމެހެއްޓެނިވި ގޮތުގައި ދުނިޔޭގެ ވަސީލަތްތައް ބޭނުންކުރެއްވުމާއި، ތިމާވެށްޓާ ރަޙްމަތްތެރި ގޮތުގައި ތަރައްޤީ ޙާޞިލު ކުރުމަށް ކެނޑިނޭޅި މަސައްކަތްޕުޅު ކުރެއްވުމުގައި ދުނިޔެއިން އެންމެ ފާހަގަކޮށްލެވޭ ފަރާތްތަކަށް، އެބޭފުޅުންގެ މަސައްކަތްޕުޅުގެ އަގު ވަޒަން ކުރެއްވުމުގެ ގޮތުން އ.ދ.އިން ދޭ އެވޯޑެކެވެ. ރައީސް ނަޝީދަށް މިއެވޯޑު ލިބިވަޑައިގަތީ، ޕޮލިސީ އަދި ލީޑަރޝިޕްގެ ދާއިރާއިންނެވެ.
