"ޔޫ.އެން. ޗެމްޕިއަންސް އޮފް ދި އާރތް އެވޯޑް" ރައީސުލްޖުމްހޫރިއްޔާއަށް ލިބިވަޑައިގަތުމުން ރާއްޖޭގެ ރައްޔިތުން އެމަނިކުފާނަށް ވަރަށް ހޫނު މަރްޙަބާއެއް ދަންނަވަން ތައްޔާރުވަމުން އެބަގެންދެއެވެ. ރައީސުލްޖުމްހޫރިއްޔާގެ އޮފީހަށް ޚަބަރު ލިބިފައިވާ ގޮތުގައި، އެމަނިކުފާނަށް މަރްޙަބާ ދެންނެވުމުގެ އިންތިޒާމްތައް ކުރިއަށް ގެންދަވަނީ ރާއްޖޭގެ އަމިއްލަ ބައެއް ޖަމާޢަތްތަކުންނެވެ.

ރައީސުލްޖުމްހޫރިއްޔާ މުޙަންމަދު ނަޝީދާއި އަނބިކަނބަލުން ލައިލާ ޢަލީ، ދެކުނު ކޮރެއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ މިރޭގެ ވަގުތެއްގައެވެ.

"ޔޫ.އެން. ޗެމްޕިއަންސް އޮފް ދި އާރތް އެވޯޑް" އަކީ، ދުނިޔޭގެ ސަލާމަތަށް، އެބޭފުޅުންގެ ދުރުވިސްނެވުމާއެކު، ދެމެހެއްޓެނިވި ގޮތުގައި ދުނިޔޭގެ ވަސީލަތްތައް ބޭނުންކުރެއްވުމާއި، ތިމާވެށްޓާ ރަޙްމަތްތެރި ގޮތުގައި ތަރައްޤީ ޙާޞިލު ކުރުމަށް ކެނޑިނޭޅި މަސައްކަތްޕުޅު ކުރެއްވުމުގައި ދުނިޔެއިން އެންމެ ފާހަގަކޮށްލެވޭ ފަރާތްތަކަށް، އެބޭފުޅުންގެ މަސައްކަތްޕުޅުގެ އަގު ވަޒަން ކުރެއްވުމުގެ ގޮތުން އ.ދ.އިން ދޭ އެވޯޑެކެވެ. ރައީސް ނަޝީދަށް މިއެވޯޑު ލިބިވަޑައިގަތީ، ޕޮލިސީ އަދި ލީޑަރޝިޕްގެ ދާއިރާއިންނެވެ.

ރައީސުލްޖުމްހޫރިއްޔާ މުޙަންމަދު ނަޝީދަށް މީގެކުރިންވަނީ ސްވިޑްންގައި ދެވޭ އެންމެ ޝަރަފްވެރި އެއް އިނާމު ކަމުގައިވާ އަނާ ލިންދު އެވޯޑް މިދިޔަ އަހަރު ލިބިވަޑައިގެންފައެވެ. އަދި މިދިޔަ އަހަރު ޓައިމް މެގަޒިންއިން "ހީރޯޒް އޮފް ދި އެންވަޔަރަންމަންޓް"ގެ ގޮތުގައި ހޮވި ބޭފުޅުންގެ ތެރޭގައިވެސް އެމަނިކުފާނު ވަނީ ހިމެނިވަޑައިގެންފައެވެ.