ރައީސުލްޖުމްހޫރިއްޔާ މުޙަންމަދު ނަޝީދު، ދެކުނު ކޮރެއާގެ އެކި ވިޔަފާރިތައް ފުޅާކުރުމަށް މަސައްކަތްކުރާ ޖަމާޢަތެއް ކަމަށްވާ ކޮޓްރާގެ އިސްބޭފުޅުންނާ ބައްދަލުކުރައްވައިފިއެވެ. ރައީސުލްޖުމްހޫރިއްޔާ ދެކުނު ކޮރެއާއަށް ކުރެއްވި ދަތުރުފުޅު ނިންމަވާލެއްވުމުގެ ކުރިން އިއްޔެ ހަވީރު އޮތް މި ބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ވީހާވެސް ގިނަ އިންވެސްޓްމަންޓްތައް ރާއްޖެއަށް ގެންނެވުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށް ވިދާޅުވެ، ރާއްޖޭގައި ހުރި އިންވެސްޓްމަންޓް ފުރުޞަތުތަކަށް ބައްލަވާލެއްވިއެވެ. މި ރޮނގުން ވާހަކަފުޅު ދައްކަވަމުން، މަސްވެރިކަމަކީ، ރާއްޖޭގެ މައިގަނޑު އެއް ޞިނާޢަތުކަން ފާހަގަކުރައްވަމުން، ރާއްޖޭގެ މަސްވެރިން ބާނާމަސް ފަސޭހައިން ބޭރަށް ވިއްކޭނެ ގޮތްތަކެއް ހަމަޖެއްސެވުމަށް ސަރުކާރުން ބޭނުންފުޅުވާ ކަމުގައި ވިދާޅުވިއެވެ. މީގެއިތުރުން، ހަކަތަ އުފައްދައިގެން ކަރަންޓް ދިނުމާއި، ގެދޮރު އެޅުމުގެ މަޝްރޫޢުގައި އިންވެސްޓް ކުރުމުގެ ފުރުޞަތުވެސް ވަރަށް ބޮޑަށް އެބައޮތް ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ކޮޓްރާގެ އިސްބޭފުޅުން ރާއްޖެއަށް ޒިޔާރަތްކުރައްވައި ކަމާބެހޭ ފަރާތްތަކާއެކު އިތުރު މަޝްވަރާތައް ކުރެއްވުމަށް ދަޢުވަތު ދެއްވިއެވެ.
ކޮޓްރާގެ އިސްބޭފުޅުން ދެއްކެވި ވާހަކަފުޅުގައި، ކޮރެއާގެ ވަރަށް ގިނަ ކުންފުނިތަކުން ރާއްޖެއިން ބޭރުގައި އިންވެސްޓް ކުރަމުން ގެންދާ ކަމަށާއި، ރާއްޖެއަށް އިތުރު އިންވެސްޓްމަންޓްތައް ހޯއްދަވައި ދެއްވުމަށް އެބޭފުޅުން މަސައްކަތްޕުޅު ކުރައްވާނެ ކަމުގައި ވިދާޅުވިއެވެ. އަދި ރާއްޖޭގައި އިންވެސްޓް ކުރުމުގައި ހުރި ފަސޭހަތަކާއި އިންވެސްޓް ކުރާ ފަރާތްތަކަށް ސަރުކާރުން ވެދެއްވާނެ އެހީތެރިކަމާބެހޭގޮތުން އެބޭފުޅުން މަޢްލޫމާތު އޮޅުން ފިލުއްވިއެވެ.
ރައީސުލްޖުމްހޫރިއްޔާގެ ދެކަނބަލުން ދެކުނުކޮރެއާއަށް ކުރެއްވި ދަތުރުފުޅު ނިންމަވާލެއްވުމަށްފަހު ރޭ މެންދަމުގެ ވަގުތެއްގައި ސިންގަޕޫރަށް ވަޑައިގެންފިއެވެ.
