ދެކުނު ކޮރެއާގެ މަސްވެރިކަމުގެ ދާއިރާގެ އިސްބޭފުޅުންނާ ރައީސުލްޖުމްހޫރިއްޔާ މުޙަންމަދު ނަޝީދު މިއަދު ބައްދަލުކުރައްވައިފިއެވެ. މިބައްދަލުކުރެއްވުމުގައި، ކޮރެއާގެ މިނިސްޓްރީ އޮފް ފުޑް، އެގްރިކަލްޗަރ، ފޮރެސްޓްރީ އެންޑް ފިޝަރީޒްގެ ޑިރެކްޓަރ ޖެނެރަލް، ޑިސްޓެންޑް ވޯޓަރ ފިޝަރީޒް ބިއުރޯގެ ޑިރެކްޓަރ ޖެނެރަލް ލީ ވޫ އާއި، ކޮރެއާ އޯވަރސީޒް ފިޝަރީޒް އެސޯސިއޭޝަންގެ ޗެއަރމަން ޔަންގ-ނަމް ޗަންގ އާއި، މަސްވެރިކަމުގެ ވިޔަފާރި ހިންގާ ބޮޑު ދެކުންފުންޏެއް ކަމުގައިވާ ސާޖޯ އިންޑަސްޓްރީޒްގެ ޑިރެކްޓަރާއި، ޑޮންގްވޮން އިންޑަސްޓްރީޒްގެ އެގްޒެކެޓިވް ޑިރެކްޓަރ ބައިވެރިވެވަޑައިގެންނެވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރާއްޖޭގެ މަސްވެރިކަމަށާއި، މަސްވެރިންނަށް ދިމާވެފައިވާ ދަތިތަކުގެ މައްޗަށް ބައްލަވައިލެއްވިއެވެ. އަދި ރާއްޖޭގެ މަސްވެރިން ބާނާ މަސް، ބޭރަށް ވިއްކޭނެ ގޮތެއް ހަމަޖެއްސެވުމަކީ، ސަރުކާރުން ވަރަށް ބޮޑަށް ބޭނުންފުޅުވާ ކަމެއް ކަމަށާއި، މަސް ގަންނާނެ ބޯޓްފަހަރު ރާއްޖެ އައިސް، ރާއްޖޭގެ މަސްވެރިންގެ އަތުން މަސްގަނެ، ބޭރުކުރެވޭނެ ގޮތެއް އޮތުމަކީ، ރާއްޖޭގެ މަސްވެރިންނަށްވެސް ލިބޭނެ ވަރަށްބޮޑު ފައިދާއެއް ކަމުގައި ވިދާޅުވިއެވެ. އަދި އެފަދަ ފަރާތްތަކަށް ސަރުކާރުން މަރްޙަބާ ވިދާޅުވާނެކަން ރައީސުލްޖުމްހޫރިއްޔާ ހާމަކުރެއްވިއެވެ.
މިބައްދަލުކުރެއްވުމުގައި، އެބޭފުޅުން ދެއްކެވި ވާހަކަފުޅުގައި، ރާއްޖޭގެ މަސްވެރިކަމުގެ ދާއިރާގައި ހުރި ފުރްޞަތުތައް، އެބޭފުޅުންނާ ރައީސުލްޖުމްހޫރިއްޔާ ޙިއްޞާ ކުރެއްވި ކަމަށްޓަކައި ރައީސުލްޖުމްހޫރިއްޔާއަށް ޝުކުރު އަދާކުރެއްވިއެވެ. އަދި އެކުންފުނިތަކުން ރާއްޖެއަށް ޒިޔާރަތްކޮށް، ރާއްޖޭގެ މަސްވެރިން ބާނާ މަސް ގަތުމަށް ހުރި ފުރްޞަތުތަކާ ބެހޭގޮތުން ކަމާބެހޭ ފަރާތްތަކާއެކު އިތުރު މަޝްވަރާތައް ކުރާނެ ކަމުގެ ޔަޤީންކަން ރައީސުލްޖުމްހޫރިއްޔާއަށް ދެއްވިއެވެ.
