ރާއްޖޭގައި ހުރި އިންވެސްޓްމަންޓްސް ފުރްޞަތުތަކާ ބެހޭގޮތުން ދެކުނު ކޮރެއާގެ ވިޔަފާރި ކުންފުނިތަކުގެ ބޭފުޅުންނަށް ރައީސުލްޖުމްހޫރިއްޔާ މުޙަންމަދު ނަޝީދު، މަޢްލޫމާތު ދެއްވައިފިއެވެ. ދެކުނު ކޮރެއާގެ ސޯލްގައި ރައީސުލްޖުމްހޫރިއްޔާ ހުންނަވާ ހޮޓަލުގައި މިއަދު ހެނދުނު އޮތް މިބައްދަލުކުރެއްވުމުގައި ހިމެނެނީ، މަސްވެރިކަމާއި ފަތުރުވެރިކަން ކަމަށާއި، މިދެދާއިރާގައިވެސް އަދި އެނޫން އެހެން ދާއިރާތަކުގައިވެސް ޚާއްޞަކޮށް، ހަކަތަ އުފައްދައިގެން ކަރަންޓް ދިނުމާއި، ގެދޮރު އެޅުމުގެ މަޝްރޫޢުގައި އިންވެސްޓް ކުރުމުގެ ފުރްޞަތުތައް ހުޅުވިފައިވާ ކަމުގައި ވިދާޅުވިއެވެ. މިގޮތުން، ސަރުކާރުން ހިންގަވަމުން ގެންދަވާ ބައެއް މަޝްރޫޢުތަކަށް ބައްލަވާލައްވައި، އެކަމުގެ އިތުރު ތަފްޞީލު، ރައީސުލްޖުމްހޫރިއްޔާ ދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގައި އިންވެސްޓް ކުރަން ޝައުޤުވެރިވާ ދެކުނު ކޮރެއާގެ ކުންފުނިތަކަށް ދިވެހި ސަރުކާރުން މަރްޙަބާ ވިދާޅުވާނެ ކަމަށް ވިދާޅުވިއެވެ. އަދި ރާއްޖެއަށް ޒިޔާރަތް ކުރަމުންދާ ދެކުނު ކޮރެއާގެ ޓޫރިސްޓުންގެ ޢަދަދު އިތުރުވަމުން އަންނަކަން އެމަނިކުފާނު ފާހަގަކުރެއްވިއެވެ.
މިބައްދަލުކުރެއްވުމުގައި، ރާއްޖޭގައި އިންވެސްޓް ކުރުމުގެ ޝައުޤުވެރިކަން، ކޮރެއާގެ ކުންފުނިތަކުން ހާމަކުރިއެވެ. އަދި ރާއްޖޭގައި އިންވެސްޓް ކުރުމުގައި ހުރި ފަސޭހަތަކާއި ދަތިތަކާ ބެހޭގޮތުންނާއި، މިކަމުގައި ދިވެހި ސަރުކާރުން ގެންގުޅުއްވާ ސިޔާސަތާ ބެހޭގޮތުން އެބޭފުޅުން ބޭނުންފުޅުވި މަޢްލޫމާތު، ރައީސުލްޖުމްހޫރިއްޔާ އެބޭފުޅުންނަށް ދެއްވިއެވެ.
