ދެކުނު ކޮރެއާގެ ސޯލްގައި ހުންނަވައިގެން، ރައީސުލްޖުމްހޫރިއްޔާ މުޙަންމަދު ނަޝީދު މިއަދު ދެއްވި އެމަނިކުފާނުގެ 45 ވަނަ ރޭޑިއޯ ޚިޠާބުގައި، އެމަނިކުފާނު އެޤައުމަށް ކުރައްވަމުން ގެންދަވާ ދަތުރުފުޅުގެ މައްޗަށާއި، ލާމަރްކަޒީ ބިލަށާއި، އަދި ސިފައިންގެ ޚިދްމަތުގެ މައްޗަށް ބައްލަވާލައްވައިފިއެވެ.
ދެކުނު ކޮރެއާ ދަތުރުފުޅު
ދެކުނު ކޮރެއާއަށް ކުރައްވަމުން ގެންދަވާ ދަތުރުފުޅުގެ މައްޗަށް ރައީސުލްޖުމްހޫރިއްޔާ ބައްލަވާލައްވަމުން، ރާއްޖޭގެ ތަރައްޤީގެ އެކިއެކި މަޝްރޫޢުތަކުގައި އެހީތެރިވެދޭނެ ގޮތްތަކާ ބެހޭގޮތުން ކޮރެއާ ސަރުކާރާ އެކުގައި، މިދަތުރުފުޅުގައި މަޝްވަރާ ކުރައްވަމުން ގެންދަވާ ކަމަށާއި، މީގެ ހެޔޮ ނަތީޖާ ރާއްޖެއަށް ލިބިގެންދާނެ ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ މިދަތުރުފުޅަކީ، ޔުނެޕުން އިންތިޒާމު ކުރައްވައިގެން ބާއްވާ ތިމާވެށްޓާބެހޭ ސަމިޓެއްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މި ސަމިޓުގައި ރައީސުލްޖުމްހޫރިއްޔާވަނީ އިއްޔެ ތަޤްރީރު ކުރައްވާފައެވެ. ހަމައެހެންމެ، ތިމާވެށީގެ ރޮނގުން ދުނިޔޭގައި ދެވޭ އެންމެ ޝަރަފްވެރި އެވޯޑް ކަމުގައިވާ "ޔޫ.އެން. ޗެމްޕިއަންސް އޮފް ދި އާރތް އެވޯޑް" ރައީސުލްޖުމްހޫރިއްޔާއަށް އިއްޔެ ވަނީ ލިބިވަޑައިގެންފައެވެ.
ލާ މަރްކަޒީ ބިލު
ރާއްޖޭގެ ރަށްތައް ލާމަރްކަޒީ އުޞޫލުން ހިންގާނީ ކޮންގޮތަކުންތޯ ދެނެގަތުމަކީ، ރާއްޖެއަށް މިވަގުތު ވަރަށް މުހިންމު ކަމެއްކަން ފާހަގަކުރައްވަމުން، ބޮޑު ދެ ސިޔާސީ ޕާޓީގެ ޚިޔާލު ވަނީ މިކަމުގައި ވަރަށް ބޮޑަށް ތަފާތުވެފައި ކަމަށް ރައީސުލްޖުމްހޫރިއްޔާ ވިދާޅުވިއެވެ. މިގޮތުން، ސަރުކާރުން ރައްޔިތުންގެ މަޖިލީހަށް ހުށަހަޅުއްވާފައިވާ ބިލު، ރައްޔިތުންގެ މަޖިލީހުގެ ކޮމިޓީއިން އިޞްލާޙު ކުރައްވައި ހުށަހަޅުއްވަން ތައްޔާރުވެފައި އެއޮތީ، ޑީ.އާރު.ޕީ.އިން މިކަމުގައި އެދޭގޮތަށް ކަމުގައި ވިދާޅުވިއެވެ.
"އިޞްލާޙުވެފައި އޮތް ބިލް، އެ އިޝާރާތް އެކުރަނީ، 20 ކުޑަ ސަރުކާރު ރާއްޖޭގައި ޤާއިމު ކުރުމަށް" ރައީސުލްޖުމްހޫރިއްޔާ ވިދާޅުވިއެވެ. އަދި ކޮމިޓީއިން އިޞްލާޙު ކުރައްވާފައިވާ މިބިލުގައި އަތޮޅުތަކަށްދޭ އިޚްތިޔާރާއި ބާރުތައް ވަރަށްބޮޑު ދަރަޖައަކަށް ލާމަރްކަޒުވެގެން އެބަދާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅު ކުރިއަށް ގެންދަވަމުން، ކޮންމެގޮތަކަށް ރައްޔިތުންގެ މަޖިލީހުން ނިންމެވި ނަމަވެސް، ރައްޔިތުންގެ މަޖިލީހުން ނިންމަވާ ގޮތަކަށް މިކަން ކުރެއްވުމަށް އެމަނިކުފާނު މި ހުންނެވީ ވަރަށް ބޮޑަށް ތައްޔާރަށް ކަމުގައި ވިދާޅުވިއެވެ. އަދި ރާއްޖެ 7 ސަރަޙައްދަކަށް ބަހާލައިގެން، ލާމަރްކަޒު ކުރުމުގެ ވިސްނުން ސަރުކާރުން މިގެންގުޅުއްވަނީ އިޤްތިޞާދީ ބޭނުމަށްޓަކައި ކަމަށާއި، އޭގައި އެއްވެސް ސިޔާސީ ބޭނުމެއް ނެތް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސިފައިންގެ އަހަރީ ދުވަސް
ދިވެހި ސިފައިންގެ 118ވަނަ އަހަރީ ދުވަހުގެ މައްޗަށް ބައްލަވާލައްވަމުން، އަޅުގަނޑުމެންނަށް ސިފައިންގެ ފަރާތުން ދިވެހިރާއްޖޭގެ ޚާއްޞަކޮށް، ޑިމޮކްރަސީއަށް ލިބިދީފައިވާ އެހީތެރިކަން ހަނދާން ނައްތާލައިގެން ނުވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސިފައިން ރާއްޖެއަށް ވެދެއްވާފައިވާ އަދި ވެދެއްވަމުން ގެންދަވާ ޚިދްމަތްތަކުގެ މައްޗަށް ރައީސުލްޖުމްހޫރިއްޔާ ބައްލަވާލައްވަމުން، ރާއްޖޭގައި ވެރިކަމުގެ ނިޒާމު ބަދަލުވެގެންދިޔައިރު، އެގޮތަށް އެކަން ހިނގުމަށް، އެންމެ ފަހި ފުރްޞަތެއް ހޯދައިދިން އެއްބަޔަކީ ނުވަތަ އެއް މުއައްސަސާއަކީ، އެމަނިކުފާނުގެ ނަޒަރުގައި ރާއްޖޭގެ ސިފައިން ކަމުގައިވެސް ވިދާޅުވިއެވެ.
