އިންސާނުންގެ ފަރާތުން ނަހަމަ ގޮތުގައި ފައިދާ ހޯދުމަށް އެއްތަނުން އަނެއްތަނަށް ގެންދިއުން ހުއްޓުވުމަށް، ޤާނޫނު ތަންފީޒުކުރާ ހުރިހާ އިދާރާތަކާއި، ސަރުކާރާއި، މަދަނީ މުޖްތަމަޢާއި، ބައިނަލްއަޤްވާމީ ދާއިރާތައް ގުޅިގެން އެކުގައި މަސައްކަތް ކުރުމަށް ނައިބު ރައީސް ޑޮކްޓަރ މުޙަންމަދު ވަޙީދު ގޮވާލައްވައިފިއެވެ. އެމަނިކުފާނު މިކަމަށް ގޮވާލެއްވީ، ސާރކް ކޮންވެންޝަން އޮން ޓްރެފިކިންގ ރާއްޖެއާއި މި ސަރަޙައްދުގައި ތަންފީޒު ކުރެވެމުންދާ މިންވަރު ދިރާސާ ކުރުމަށް އިންޓަރނޭޝަނަލް އޯގަނައިޒޭޝަން ފޮރ މައިގްރޭޝަން (އައި.އޯ.އެމް.)އާއި އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ.) ގުޅިގެން ކުރި ދިރާސާ ރިޕޯޓް ހާމަ ކުރުމަށް މިއަދު ބޭއްވެވި ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުން އޮތީ މިއަދު ހެނދުނު ނަލަހިޔާ ހޮޓަލުގެ ކޮންފަރެންސް ހޯލުގައެވެ.
ނައިބު ރައީސްގެ ވާހަކަފުޅުގައި، ޖިންސީ ވިޔަފާރި ހިންގުމާއި، ނަހަމަގޮތުގައި ފައިދާ ހޯދުމަށް ޚާއްޞަ ގޮތެއްގައި އަންހެނުންނާއި އަންހެން ކުދިން، އެއް ޤައުމުން އަނެއް ޤައުމަށް ގެންދިއުމާއި ބޭނުންކުރުން ދުނިޔޭގައި ފެތުރިފައިވާ މިންވަރުގެ މައްޗަށް ބައްލަވާލައްވަމުން، މިއީ ޤާނޫނު ތަންފީޒުކުރާ އިދާރާތަކަށް ވަންހަނާވެފައި އޮވެގެންވާނެ މައްސަލައެއް ނޫންކަމުގައި ވިދާޅުވިއެވެ.
ހިއުމަން ޓްރެފިކިންގގެ މައްސަލައަކީ، ރާއްޖޭގައިވެސް ބޮޑުވަމުންދާ މައްސަލައެއްކަމަށް ވިދާޅުވެ، އެކަމުގެ ކަންބޮޑުވުން އެމަނިކުފާނު ފާޅުކުރެއްވިއެވެ. އަދި މި ރިޕޯޓުގެ ނަތީޖާގެ މައްޗަށް ބައްލަވާލެއްވިއެވެ.މީގެއިތުރުން، ރާއްޖޭގައި މި މައްސަލަ އިތުރަށް ފުޅާވެގެންދިޔަ ނުދިނުމަށްޓަކައި ކުރުމަށް ލަފާދެއްވާފައިވާ ކަންތައްތަކުގެ މައްޗަށްވެސް ނައިބު ރައީސް އަލިއަޅުއްވާލެއްވިއެވެ. މި ގޮތުން ރާއްޖޭގައި ހިއުމަން ޓްރެފިކިންގ ހުއްޓުވުމަށް ފުރިހަމަ ޤާނޫނީ އޮނިގަނޑެއް އެކުލަވާލައި، ޓްރެފިކިންގގެ ސަބަބުން ރާއްޖޭގައި ގެއްލުން ލިބޭ އެހެން ޤައުމުތަކުގެ މީހުން އެމީހުންގެ ޤައުމަށް ފަސޭހައިން ފޮނުވޭނެ ނިޒާމެއް ޤާއިމް ކުރުމަށް ލަފާދެއްވާފައިވާ ކަމުގައި ނައިބު ރައީސް ވިދާޅުވިއެވެ. އަދި މިކަން ހުއްޓުވުމަށް ސަރުކާރުން ވަރަށް ގިނަގޮތް ގޮތުން މަސައްކަތް ކުރައްވަމުން ގެންދަވާ ކަމާއި، މިހާރުވެސް ރާއްޖޭގައި މިގޮތުން ގެއްލުން ލިބޭ މީހުން އެމީހުންގެ ޤައުމަށް ފޮނުވާލުމުގެ ނިޒާމެއް ޤާއިމް ކުރެވިފައިވާކަން ނައިބުރައީސް ފާހަގަކުރެއްވިއެވެ.
ނައިބު ރައީސްގެ ވާހަކަފުޅުގައި، މި ބައްދަލުވުމަކީ ހިއުމަން ޓްރެފިކިންގ ހުއްޓުވުމަށް ބޭނުންވާ ނިޒާމާއި، ޤާނޫނީ އޮނިގަނޑު ޤާއިމްކޮށް، ސަރުކާރުގެ އިދާރާތައް މިކަމާ ދެކޮޅަށް މަސައްކަތް ކުރުމުގައި އިތުރަށް ވަރުގަދަ ކުރުމަށް އެޅޭ މުހިންމު ފިޔަވަޅެއްކަމުގައި ވިދާޅުވިއެވެ.
މިއީ، ހިއުމަން ރައިޓްސް ކޮމިޝަނާއި، ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނާއި، އައި.އޯ.އެމް. އަދި އޭ.ޑީ.ބީ. ގުޅިގެން ބޭއްވެވި ބައްދަލުވުމެކެވެ.
