6 އޭޕްރިލް 2010ވި އަންގާރަ ދުވަހު އޮތް ރައްޔިތުންގެ މަޖިލީހުގެ 2010 ވަނަ އަހަރުގެ ފުރަތަމަ ދައުރުގެ 17 ވަނަ ޖަލްސާއިން ފާސްކުރެއްވި " މޯލްޑިވްސް ބްޜޯޑްކާސްޓިންގ ކޯޕަރޭޝަން ޤާއިމު ކުރުމުގެ ބިލް" ރައީސުލްޖުމްހޫރިއްޔާ މުޙަންމަދު ނަޝީދު، މިއަދު ތަޞްދީޤު ކުރައްވައިފިއެވެ. ތަޞްދީޤު ކުރެއްވުމާ ގުޅިގެން، މި ޤާނޫނު ދިވެހި ސަރުކާރުގެ ގެޒެޓުގައި މިއަދު ޝާއިޢު ކުރައްވައިފިއެވެ.
މި ޤާނޫނަކީ، ޕަބްލިކް ބްރޯޑްކާސްޓަރެއްގެ ގޮތުގައި، ދައުލަތުގެ މީޑިއާ ޤާއިމުކޮށް، އެކުންފުނީގެ ޢާންމު ސިފަތަކާއި އެކުންފުނި ހިންގުމުގެ ޢާންމު އުޞޫލުތައް ބަޔާންކޮށް، ރައްޔިތުންގެ ލާބަޔާއި މަންފާއާއި މަޞްލަޙަތަށްޓަކައި، ރައްޔިތުންނަށް ކަންކަން އަންގައިދިނުމާއި، ކަންކަން އުނގަންނައިދިނުމާއި، ރައްޔިތުން މުނިފޫހިފިލުވައިދިނުމާއި، ނުފޫޒުން އެއްކިބާވެގެންވާ، ފޭރާންހެޔޮ، ޒިންމާ އުފުލަނިވި މިނިވަން ބްރޯޑްކާސްޓިންގ ޚިދުމަތެއް، މޯލްޑިވްސް ބްރޯޑްކާސްޓިންގ ކޯޕަރޭޝަންގެ ނަމުގައި އެ ކޯޕަރޭޝަންއިން ފޯރުކޮށްދިނުމުގެ އުޞޫލުތައް ބަޔާންކުރުމުގެ ޤާނޫނެވެ.
މި ޤާނޫނުގެ ބޭނުމަކީ، އިސްލާމްދީނާއި ދިވެހިރާއްޖޭގެ ޘަޤާފަތާއި ބަސްކުރިއެރުވުމަށް ފުޅާ ދާއިރާއެއްގައި މަސައްކަތް ކުރުމާއި، ސިޔާސީ ނުފޫޒުންނާއި އިޤްތިޞާދީ ނުފޫޒުންނާއި މާލީ ނުފޫޒުން މިނިވަންވެގެންވާ ޕަބްލިކް ސަރވިސް ބްރޯޑްކާސްޓަރެއްގެ ދައުރު ކަށަވަރުކޮށްދިނުމާއި ކުރިއަށް ނެރެދިނުމާއި، ޤައުމުގެ ހުރިހާ ހިސާބުތަކަކަށް ފޯރުކޮށްދެވޭ، ރައްޔިތުންގެ ހުރިހާ ގިންތިތަކަކަށް މަންފާ ލިބޭ، ފޭރާންހެޔޮ ޕްރޮގްރާމްތަކެއް ބްރޯޑްކާސްޓްކުރުމަށް މަގުފަހިކޮށްދިނުމެވެ. އަދި ރައްޔިތުންނަށް ސީދާ ޖަވާބުދާރީވާ، ރައްޔިތުންނަށްޓަކައި މަސްއޫލިއްޔަތު އުފުލަނިވި އޮނިގަނޑެއްގެ ތެރެއިން ބްރޯޑްކާސްޓްކުރުމުގެ ޚިދުމަތް ދިނުމާއި، މޯލްޑިވްސް ބްރޯޑްކާސްޓިންގ ކޯޕަރޭޝަން، ޕަބްލިކް ސަރވިސް ބްރޯޑްކާސްޓަރެއްގެ ގޮތުގައި ޤާއިމުކޮށް، އެގޮތުގައި ދެމެހެއްޓުމަށްޓަކައި ބޭނުންވާ މާލީ އެހީތެރިކަން ހޯދައިދީ، މުވައްޒަފުންގެ ވަޒީފާގެ ރައްކާތެރިކަން ޤާއިމުކޮށްދީ، އެޑިޓޯރިއަލް މިނިވަންކަން އެކަށައަޅައިދިނުމެވެ.
މި ޤާނޫނަށް ޢަމަލުކުރަން ފެށުމާއެކު، މޯލްޑިވްސް ބްރޯޑްކާސްޓިންގ ކޯޕަރޭޝަންގެ ނަމުގައި، ދައުލަތުގެ މިނިވަން މުއައްސަސާއެއްގެ ގޮތުގައި، އަދި މި ޤާނޫނުން ލިބިދީފައިވާ ރައްކާތެރިކަމުގެމަތީގައި، އަދި މި ޤާނޫނުގައިވާ އުޞޫލުތަކާ އެއްގޮތްވާ ގޮތުގެމަތިން، ޕަބްލިކް ސަރވިސް ބްރޯޑްކާސްޓިންގގެ ޚިދުމަތްދޭނެ ފަރާތް ދިވެހިރާއްޖޭގައި ޤާއިމު ކުރެވުނީއެވެ. މިޤާނޫނުން މޯލްޑިވްސް ބްރޯޑްކާސްޓިންގ ކޯޕަރޭޝަންއަށް ދީފައިވާ މިނިވަންކަމަކީ، ހަމަ ހުރިހާ ޙާލަތެއްގައިމެ، ހުރިހާ ފަރާތަކުންމެ، އިޙްތިރާމު ކުރަންޖެހޭނެ މިނިވަން ކަމެކެވެ.
މި ޤާނޫނުގައިވާ ގޮތުން، މޯލްޑިވްސް ބްރޯޑްކާސްޓިންގ ކޯޕަރޭޝަން ހިންގަންވާނީ ޑިރެކްޓަރުންގެ ބޯޑަކުންނެވެ. ޑިރެކްޓަރުންގެ ބޯޑު ޢައްޔަން ކުރާނީ ރައްޔިތުންގެ މަޖިލީހުންނެވެ. މިބޯޑަކީ 9 މެންބަރުންގެ މައްޗަށް އެކުލެވޭ ބޯޑެކެވެ. ޑިރެކްޓަރުންގެ ބޯޑު ޖަވާބުދާރީވާނީ ރައްޔިތުންގެ މަޖިލީހަށެވެ. އަދި ރައްޔިތުންގެ މަޖިލިސް މެދުވެރިކޮށް ޤައުމުގެ ރައްޔިތުންނަށެވެ.
ރައީސުލްޖުމްހޫރިއްޔާ މި ބިލް ތަޞްދީޤު ކުރެއްވީ، މިބިލުގެ އިމުގެ ތެރޭގައި މަޤްޞަދު ޙާޞިލު ކުރައްވަން ބޭނުންވާ އިދާރީ އޮނިގަނޑު މުޅިން ފުރިހަމަކަމުގައިނުވި ނަމަވެސް، ޤާނޫނު ތަންފީޒުކުރާ ބާރަށް ލިބިފައިވާ ޤާނޫނީ ވަސީލަތްތައް ބޭނުންކޮށްގެން އިންތިޤާލީ ގޮތެއްގައި މިޤާނޫނަށް ޢަމަލުކުރަން ފެށްޓެވުމުގެ ބޭނުންފުޅުގައެވެ. ސަބަބަކީ ރައްޔިތުންނަށް ޖަވާބުދާރީވާ ޕަބްލިކް ސަރވިސް ބްރޯޑްކާސްޓަރެއް އުފެއްދެވުމަކީ، ސަރުކާރުގެ ސިޔާސަތު ކަމަށްވެފައި، މިބިލްގައިވާ ޕަބްލިކް ބްރޯޑްކާސްޓަރާބެހޭ ޢާންމު އުޞޫލުތަކަކީ، މީޑިއާގެ މިނިވަންކަމާބެހޭ ބައިނަލްއަޤްވާމީ އެންމެހެޔޮ އަދި އެންމެ މަޤްބޫލު ސުލޫކުތަކަށް ފެތޭ ހަމަތަކެއް ކަމަށްވުމާއެކު، ރައްޔިތުންގެ ހެވާއި ލާބައަށް ވިސްނެވުމަށްފަހުގައެވެ.
މޯލްޑިވްސް ބްޜޯޑްކާސްޓިންގ ކޯޕަރޭޝަން ޤާއިމު ކުރުމުގެ ބިލަށް ޢަމަލު ކުރަން ފެށުމުން، ޤާނޫނީ އަދި މާލީގޮތުން ކުރިމަތިވެދާނެ މައްސަލަތަކާއި، އެ ޤާނޫނު ތަންފީޒު ކުރުމުގައި ހުރި ދަތިތައް ޙައްލުކޮށް، މި ބިލް އެންމެ ފުރިހަމަ ގޮތުގައި ތަންފީޒު ކުރުމަށް ހުށަހަޅަންޖެހޭ ގިނަ އިޞްލާޙުތަކެއް ހުރުމުން، އެ އިޞްލާޙުތައް ވަރަށް އަވަހަށް ރައްޔިތުންގެ މަޖިލީހަށް ހުށަހެޅުއްވުމަށް ސަރުކާރުން ވަނީ ކަނޑައަޅުއްވާފައެވެ.
