6 އޭޕްރިލް 2010ވި އަންގާރަ ދުވަހު އޮތް ރައްޔިތުންގެ މަޖިލީހުގެ 2010 ވަނަ އަހަރުގެ ފުރަތަމަ ދައުރުގެ 17 ވަނަ ޖަލްސާއިން ފާސްކުރެއްވި "ވެރިކަން ބަދަލުވުމުގެ މަރްޙަލާއާބެހޭ ބިލު" ރައީސުލްޖުމްހޫރިއްޔާ މުޙަންމަދު ނަޝީދު، މިއަދު ތަޞްދީޤު ކުރައްވައިފިއެވެ. ތަޞްދީޤު ކުރެއްވުމާ ގުޅިގެން، މި ޤާނޫނު ދިވެހި ސަރުކާރުގެ ގެޒެޓުގައި މިއަދު ޝާއިޢު ކުރައްވައިފިއެވެ.
މި ޤާނޫނަކީ ވެރިކަން ބަދަލުވުމުގެ މަރްޙަލާގައި ޢަމަލުކުރަންޖެހޭ އުޞޫލުތައް ބަޔާންކުރާ ޤާނޫނެވެ. މިޤާނޫނުގައިވާ ގޮތުން ރައީސުލްޖުމްހޫރިއްޔާ ކަމުގެ މަގާމަށާއި، ރައީސުލްޖުމްހޫރިއްޔާގެ ނައިބުގެ މަގާމަށް އިންތިޚާބުވާ ފަރާތެއް އެދިއްޖެނަމަ، ވަކި ޚަރަދުތަކަކާއި ޚިދްމަތްތަކެއް، ޑައިރެކްޓަރ ޖެނެރަލް އޮފް ޓްރާންސިޝަން ފޯރުކޮށްދޭން ޖެހެއެވެ. މިކަންކަމުގެ ތެރޭގައި، ރައީސުލްޖުމްހޫރިއްޔާއަކަށް އިންތިޚާބުވެފައިވާ މީހާ ބޭނުންކުރުމަށް އެކަށީގެންވާ އޮފީހާއި، އެ އޮފީހަށް ބޭނުންވާ އެންމެހާ ތަކެތި ހަމަޖައްސައިދިނުމާއި، އޮފީހަށް ބޭނުންވާ މުވައްޒަފުންނާއި، އެފަދަ މުވައްޒަފުންނަށް ދޭންޖެހޭ މުސާރައާއި ޢިނާޔަތްތައް ހަމަޖައްސައިދިނުމާއި، ބޭނުންވެއްޖެ ހިނދެއްގައި އެކިއެކި ފަންނީ މާހިރުންނާއި، ޖަމާޢަތްތަކުގެ ފުރިހަމަ އެހީތެރިކަމާއި، އަދި އެފަދަ ފަރާތްތަކަށް ދޭންޖެހޭ މުސާރައާއި ޢިނާޔަތްތައް ފޯރުކޮށްދިނުން ހިމެނެއެވެ. އަދި ކެއިންބުއިމާއި ދިރިއުޅުމަށް ބޭނުންވާ އެކަށީގެންވާ ތަނެއް ނުވަތަ އެކަމަށް ހިނގާ ޚަރަދާއި، ކުއްޔަށް ހިފުމަށާއި، ދަތުރުފަތުރަށް ބޭނުންވާ ޚަރަދު ހަމަޖައްސައިދިނުމާއި، މުވާޞަލާތާއި ލިޔެކިޔުމަށް ބޭނުންވާނެ އެންމެހާ ޚަރަދު ހަމަޖައްސައިދިނުމާއި، ރައީސުލްޖުމްހޫރިއްޔާއަށްދޭ ސަލާމަތާއި ރައްކާތެރިކަމާ އެއްފެންވަރަށް ރައީސުލްޖުމްހޫރިއްޔާ ކަމަށް ހޮވިފައިވާ މީހަކަށް ސަލާމަތާއި ރައްކާތެރިކަން ޤައުމީ ދިފާޢީ ބާރުގެ ފަރާތުން ހަމަޖައްސައިދިނުން ހިމެނެއެވެ.
ރައީސުލްޖުމްހޫރިއްޔާ ކަމުގެ މަގާމަށާއި އަދި ރައީސުލްޖުމްހޫރިއްޔާގެ ނައިބުގެ މަގާމަށް އިންތިޚާބުވާ މީހަކު ވާދަކުރި އިންތިޚާބުގެ ނަތީޖާ އިޢްލާނު ކުރުމުގެ ކުރިން ނުވަތަ މަގާމާ ޙަވާލުވުމަށްފަހު ކުރާ އެއްވެސް ޚަރަދަކަށް މި ޤާނޫނުގެ ދަށުން ފައިސާ ހޭދަކޮށްގެން ނުވާނެ ކަމަށް މި ޤާނޫނުގައި ބަޔާންކޮށްފައިވެއެވެ. މި ޤާނޫނުގެ ދަށުން ހޭދަކުރެވޭނީ، ގިނަވެގެން އެއްމިލިއަން ރުފިޔާއެވެ. އަދި މި ޤާނޫނުގެ ދަށުން ކުރަންޖެހޭ ކަންކަން އިންތިޒާމުކޮށް ބަލަހައްޓާނީ، ޑައިރެކްޓަރ ޖެނެރަލް އޮފް ޓްރާންސިޝަނެވެ. މިމަގާމަށް މީހަކު ޢައްޔަން ކުރާނީ، ރައީސުލްޖުމްހޫރިއްޔާ ކަމުގެ މަގާމަށް އިންތިޚާބުވާ ފަރާތުން އެދޭގޮތަށް ސިވިލް ސަރވިސް ކޮމިޝަނުންނެވެ.
