މިނިސްޓަރ އޮފް ސްޓޭޓް ފޮރ ފިނޭންސް އެންޑް ޓްރެޜަރީ ކަމަށް ރައީސުލްޖުމްހޫރިއްޔާ މުޙަންމަދު ނަޝީދު މިއަދު ބޭފުޅަކު ޢައްޔަން ކުރެއްވިއެވެ. މިމަގާމަށް ޢައްޔަން ކުރެއްވީ، މާފަންނު ސީސްކޭޕް އަސްލަމް މުޙަންމަދު ޝާކިރެވެ. އޭނާއަށް މަގާމުގެ ފަތްކޮޅު ދެއްވުމުގެ ރަސްމިއްޔާތު އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ. އަސްލަމް މުޙަންމަދު ޝާކިރު މިހާތަނަށް ހުންނެވީ ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީ ކަމުގެ މަގާމުގައެވެ.
މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އަސްލަމް މުޙަންމަދު ޝާކިރު، ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީ ކަމުގެ މަގާމުގައި ހުންނަވައިގެން ކޮށްދެއްވި މަސައްކަތްޕުޅުތައް ފާހަގަކުރައްވައި، އޭނާއަށް ޝުކުރު އަދާކުރެއްވިއެވެ. އަދި މިނިސްޓަރ އޮފް ސްޓޭޓް ފޮރ ފިނޭންސް އެންޑް ޓްރެޜަރީގެ މަގާމަށް އަސްލަމް މުޙަންމަދު ޝާކިރު މިބަދަލުކުރެއްވީ، ފިނޭންސް މިނިސްޓްރީގެ ޕްލޭނިންގ ސެކްޝަންގެ މަސައްކަތްތައް އިތުރުވެފައިވާތީ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
