ރައީސުލްޖުމްހޫރިއްޔާ މުޙަންމަދު ނަޝީދު، މާލެ އަތޮޅު މާފުށީގައި ޤާއިމް ކުރެވިފައިވާ އެމް.ޑަބްލިޔޫ.އެސް.ސީ.ގެ "ޕްރޮޑަކްޝަން ސެންޓަރ" ރަސްމީކޮށް މިއަދު އިފްތިތާޙު ކޮށްދެއްވައިފިއެވެ. މި އޮޕަރޭޝަންސް ސެންޓަރ އިފްތިތާޙު ވެގެންދިޔައީ، ޕްރޮޑަކްޝަން ސެންޓަރުގައި ޤާއިމްކުރެވިފައިވާ ސްވިޗަށް ރައީސުލްޖުމްހޫރިއްޔާ އޮއްބާލެއްވުމުންނެވެ.
މި ރަސްމިއްޔާތުގެ ކުރިން މާފުށީ ބަނދަރުގައި އެރަށުގެ ރައްޔިތުންނާ މުޚާޠަބު ކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ފެނާއި ނަރުދަމާއާއި އެނޫނަސް ޢުމްރާނީ މަސައްކަތްތަކަކީ، ސަރުކާރުގެ މައިގަނޑު ފަސް ވަޢުދުތަކުގެ ތެރޭގައި ހިމެނޭ ކަންތައްތަކެއް ނޫން ކަމުގައި ވިދާޅުވިއެވެ. އެހެންނަމަވެސް، ރާއްޖޭގެ ތަރައްޤީއަށާއި ދުޅަހެޔޮކަމާއެކު ރައްޔިތުންނަށް ދިރިއުޅެވޭނެ މަގުފަހިކޮށްދިނުމަށް ރައްޔިތުންނަށް މިހާރުން މިހާރަށް ބޭނުންވާ އަސާސީ ޚިދުމަތްތަކެއް އެބަހުރިކަން ސަރުކާރަށް ވިސްނިވަޑައިގަންނަވާ ކަމުގައި ވިދާޅުވިއެވެ.
މި މޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ރާއްޖޭގެ ރަށްތަކުގެ ތެރެއިން ވަރަށް ގިނަ ރަށެއްގެ ފެން، މިހާރު މިވަނީ ބޭނުންކުރެވޭ ވަރަށްވުރެ ގޯސްވެފައި ކަމަށާއި، ކިތަންމެ ރަށެއްގައި މިހާރުން މިހާރަށް ނަރުދަމާގެ ޚިދުމަތް ޤާއިމްކުރަން ޖެހިފައިވާ ކަމުގައި ވިދާޅުވިއެވެ. އަދި މިކަންކަން ކުރެއްވުމަށް ސަރުކާރުން ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށާއި، އެހެންނަމަވެސް، ސަރުކާރުން އެކަނި މަސައްކަތްކުރައްވައިގެން ދެމެހެއްޓެނިވި ގޮތަކަށް މިކަން ނުކުރެވޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ޕަބްލިކް ޕްރައިވެޓް ޕާޓްނަރޝިޕް އުސޫލުގެ ދަށުން މިކަންކުރެވޭނެ ކަމަށް ދެކިވަޑައިގަންނަވާ ކަމުގައިވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގެ މުހިންމުކަމުގެ މައްޗަށްވެސް ބައްލަވާލެއްވިއެވެ. މި ރޮނގުން ވާހަކަފުޅު ދައްކަވަމުން، ހަތް ޕްރޮވިންސަކަށް ބަހާލައިގެން ރާއްޖޭގެ އިދާރީ ދާއިރާތައް ހިންގެވުމަށް ސަރުކާރުން ކުރައްވާ މަސައްކަތަކީ، ސިޔާސީ އެއްވެސް ބޭނުމެއް އެކަމުގައި އޮވެގެން ކުރައްވާ މަސައްކަތެއް ނޫން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރާއްޖޭގެ އަތޮޅުތައް ސަރަޙައްދުތަކަށް ބައްސަވާލައްވައިގެން ރާއްޖޭގެ އަތޮޅުތައް ހިންގެވުމުގެ ވިސްނެވުމެއް ސަރުކާރުން މި ގެންގުޅުއްވަނީ، ރާއްޖޭގެ ތަރައްޤީ މިހާރަށްވުރެ ފަހިގޮތުގައި ކުރިއަށް ގެންދަވަން ކަމަށާއި، ލާ މަރުކަޒީ ފިކުރަކީ ކުރީގެ ސަރުކާރުންވެސް ގެންގުޅުއްވި ފިކުރެއް ކަމުގައި ރައީސް ނަޝީދު ވިދާޅުވިއެވެ. ރަށެއް ނުވަތަ އަތޮޅެއްގެ މިންވަރަކީ އިދާރީ ދާއިރާއެއްގެ ގޮތުގައި ހިންގުމަށް އިޤްތިޞާދީގޮތުން މާ ކުޑަ މިންވަރެއް ކަމަށާއި، އަތޮޅެއްގެ މިންވަރަކީ އިދާރީ ހިންގުމަށް މާ ކުޑަ މިންވަރެއް ކަމަށް، ބައިނަލްއަޤްވާމީ ފަރާތްތަކުންވެސް ލަފާ ދެއްވާފައިވާކަން އެމަނިކުފާނު ހާމަކުރެއްވިއެވެ. އަދި، "ރައްޔިތުންގެ މަޖިލީހުގައި ޒުވާބުކޮށް ތަޅާފޮޅާ އަރާރުންވެގެން ކުރަން ބޭނުން އެއްވެސް ކަމެއް ނެތް" ކަމަށާއި، ސަރުކާރުން އަބަދުވެސް ބައްލަވާނީ ރައްޔިތުންނަށް އެންމެ ރަނގަޅު ގޮތަކަށް ކަންކަން ކުރެއްވުމަށް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
އަބަދުވެސް ފަހަތަށް ޖެހެން ސަރުކާރަށް އެނގޭނެ ކަމަށާއި، އިދާރީ ދާއިރާތައް ހަތް ސަރަޙައްދަކަށް ބެހުމުން "އެކަމުގައި ތަރައްޤީއަށް އޮތް ހުރަހެއް ނުވަތަ އިޤްތިޞާދަށް އޮތް ހުރަހެއް ސާފުކޮށްދެއްވައިފިނަމަ ފަހަތަށް ޖެހެން އަޅުގަނޑުމެން މިތިބީ ތައްޔާރަށް" ކަމުގައި ރައީސުލްޖުމްހޫރިއްޔާ ވިދާޅުވިއެވެ.
