ނައިބު ރައީސް ޑޮކްޓަރ މުޙަންމަދު ވަޙީދު ޙަސަންމަނިކު، ހުވަދުއަތޮޅު ދެކުނުބުރީގެ ބައެއް ރަށްރަށަށް ކުރައްވާ ދަތުރުފުޅެއް ފަށްޓަވައިފިއެވެ. މި ދަތުރުފުޅުގައި އެމަނިކުފާނު ރޭ ތިނަދުއަށް ވަޑައިގަތުމުން، ތިނަދޫން އެމަނިކުފާނަށް ވަރަށް ހޫނު މަރުޙަބާއެއް ދެންނެވިއެވެ.
ނައިބު ރައީސްގެ މިދަތުރުފުޅުގައި، ތިނަދޫގެ އެއް ޕްރީ-ސްކޫލް ކަމަށްވާ އެމް.އެމް. ޕްރީސްކޫލްގެ އަހަރީ ދުވަހުގެ މުނާސަބަތުގައި ބާއްވަވާ ޚާއްޞަ ޖަލްސާގައި ބައިވެރިވެވަޑައިގަންނަވާނެއެވެ. މި ޖަލްސާ އޮންނާނީ މާދަމާ ރެއެވެ. މިދަތުރުފުޅުގައި އެމަނިކުފާނު މިއަދު މެންދުރުފަހު އެ އަތޮޅު ހޯނޑެއްދޫއަށާއި މަޑަވެއްޔަށް ވަޑައިގެން، އެ ދެ ރަށުގެ ވެރިންނާއި ކޮމިޓީތަކުގެ އިސްވެރިންނާ ބައްދަލުކުރައްވާ ގޮތަށްވެސް ވަނީ ހަމަޖެހިފައެވެ.
