ކޮންމެ ދައުލަތެއްގެވެސް އެންމެ މުހިންމު އެއް މިލްކިއްޔާތަކީ، އެޤައުމެއްގެ ބިން ކަމަށާއި، ޤައުމެއްގެ އިޤްތިޞާދު ބިނާވެފައި އޮންނަނީ، އެޤައުމެއްގެ ބިމުގެ ތަނަވަސްކަމާއި، އެ ބިމުގެ މުއްސަނދިކަމުގެ މައްޗަށް ވަރަށް ބޮޑަށް ބަރޯސާވެގެން ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ އަޑު މެދުވެރިކުރައްވައި، އެމަނިކުފާނު މިއަދު ހެނދުނު ދެއްވި ހަފްތާގެ ރޭޑިޔޯ ޚިޠާބުގައި، ރާއްޖޭގައި ބިން ހެޔޮގޮތުގައި ބޭނުންކުރެވޭނެ ޢާންމު އޮނިގަނޑެއް އެކުލަވައިލުމުގެ މުހިންމުގެ ކަމުގެ މައްޗަށް ވާހަކަފުޅު ދައްކަވަމުންނެވެ. އެމަނިކުފާނު މިއަދު ދެއްވި ރޭޑިޔޯ ޚިޠާބު، ބިނާކުރެއްވީ މި މައުޟޫޢުގެ މައްޗަށެވެ.
ބިމަކީ ވިޔަފާރިތަކާއި ޢާއިލާތަކާއި މާލީ އިދާރާތަކާއި އަދި މިނޫންވެސް މުޖްތަމަޢުގައި ހިމެނޭ އެންމެހާ ފަރާތްތަކުގެ އެންމެ ބޭނުންތެރި މިލްކިއްޔާތުކަން ބަޔާންކުރައްވަމުން، އެންމެންނަށް ފައިދާހުރި ގޮތަކަށް ބިން ބޭނުންކުރެވޭނެގޮތް ހެދޭނީ، ބިން ބޭނުންކުރާނެ ގޮތުގެ ޕްލޭނެއް ކުރެވިގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ހުރިހާ ފަރާތްތަކެއްގެ ބޭނުންތައް އެފަދަ ޕްލޭނެއްގައި ހިމެނި، އަދި އެކިއެކި ބޭނުންތައް ފުށުއަރާ ޙާލަތްތަކުގައި އެމައްސަލަތައް ޙައްލުކުރެވޭނެ ނިޒާމެއްވެސް ޤާއިމު ކުރެވިގެން ކަމުގައި އެމަނިކުފާނު ވިދާޅުވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، އޭގެ ބޭނުމަކީ ބިމަކީ ދައުލަތުގެ އެންމެ މުހިންމު އެއްބައި ކަމަށްވެފައި، ޤައުމުގައި ދިރިއުޅޭ މީސްމީހުންނަށް އަމާންކަމާއި ހިތްހަމަޖެހުމާއެކު، އެހެން މީސްމީހުންގެ ފުށުން އުނދަގުލެއް ނުވަތަ ތުރާލެއްނެތި ބޯހިޔާކޮށްގެން ދިރިއުޅެވޭނެ މަގު ތަނަވަސްކުރުމަށް މަގުފަހިކުރުމެވެ. އަދި އިޤްތިޞާދީ ޙަރަކާތްތަކަށް އެންމެންނަށް ހަމަހަމަ ފުރްޞަތުތަކުން ބިން ލިބި، ބިން ބޭނުންކުރެވޭނެ ގޮތެއް ހަމަޖެއްސުމާއި، ބިމުގައި ހިންގާ އެކިއެކި ޙަރަކާތްތަކުގެ ސަބަބުން މީހުންނަށާއި ތިމާވެށްޓަށް ލިބޭ އެކިއެކި ގެއްލުންތައް ކުޑަކުރުމެވެ.
ޒަމާނުއްސުރެ ފަށައިގެން ރާއްޖޭގެ ބިން ބޭނުންކުރެވެމުން އައި ގޮތުގެ މައްޗަށްވެސް ރައީސުލްޖުމްހޫރިއްޔާ ވަރަށް ތަފްޞީލުކޮށް ބައްލަވައިލެއްވިއެވެ. އަދި 2002 ވަނަ އަހަރު ފާސްކުރެވުނު ދިވެހިރާއްޖޭގެ ބިމާބެހޭ ޤާނޫނުގެ އެކިމާއްދާތަކުގެ މައްޗަށްވެސް ބައްލަވައިލެއްވިއެވެ. މީގެއިތުރުން، ޓޫރިސްޓް ރިޒޯޓްތައް ކައިރީގައި ހުރި ކުދި ރަށްރަށާއި ވެލިފިނޮޅުފަދަ ތަންތަން އިޤްތިޞާދީ ގޮތުން އެންމެ ފައިދާހުރި ގޮތެއްގައި ބޭނުންކުރެވޭނެ ގޮތެއް މިހާރު ހޯދަން ޖެހިފައިވާކަންވެސް އެމަނިކުފާނު ބަޔާންކުރެއްވިއެވެ. މިރޮނގުން ވާހަކަފުޅު ދައްކަވަމުން، މިގޮތުން އެންމެ ފުރަތަމަ ކުރަންޖެހޭ ކަމަކީ މިފަދަ ކުދި ރަށްތަކާއި ފިނޮޅުތަކުގެ ދަފްތަރެއް ޤާއިމު ކުރުން ކަމަށާއި، މިފަދަ ރަށްތަކާއި ފިނޮޅުތަކުގެ މަޢްލޫމާތު އެކުލެވޭ ދަފްތަރެއް، އިރާދަކުރެއްވިއްޔާ ވަރަށް ކައިރި މުސްތަޤްބަލެއްގައި ސަރުކާރުން ޤާއިމު ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރަށްރަށުގެ ބިން ހެޔޮގޮތުގައި ބޭނުންކުރެވޭނެ ގޮތް ހެއްދެވުމަށް ސަރުކާރުން ކުރައްވަމުން ގެންދަވާ މަސައްކަތުގެ މައްޗަށްވެސް ރައީސުލްޖުމްހޫރިއްޔާ ބައްލަވައިލެއްވިއެވެ. އެމަސައްކަތުގައި ދިމާވާ އެންމެބޮޑު ދައްޗަކީ، ރަށްރަށުގެ މެދުގައި ނުވަތަ ރަށްރަށުގެ ތެރޭގައި ބޭނުންނުކޮށް ފަޅަށްހުރި ބޮޑެތި ގޯތިތައް ހުރުން ކަމަށާއި، އޭގެ ސަބަބުން ބިން ހެޔޮގޮތުގައި ބޭނުންކުރުމުގެ މަޝްރޫޢު ރޭއްވެވުމުގައި ދަތިތަކެއް ދިމާވާ ކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ މިއަދު ދެއްވި ރޭޑިޔޯ ޚިޠާބުގައި، ބިމާ ގުޅޭގޮތުން އެންމެންވެސް ވިސްނުމަށް އެދިވަޑައިގެން، ބިމާގުޅޭ ޢާންމު އުޞޫލެއް، ޢާންމު އޮނިގަނޑެއް އެކުލަވައިލަން އެބަޖެހޭ ކަމަށް ވިދާޅުވިއެވެ. އަދި އެ އޮނިގަނޑުގެ ތެރެއިން ބިމާގުޅޭ ޙައްލުތަކެއް ހޯދަން ޖެހިފައިވާ ކަމަށާއި، ބައެއް ފަރާތްތަކުން ބޮޑެތި ބިމާއި ފަޅުތައް ހިއްކައި، އެބިމުގެ ވިޔަފާރީގެ ފައިދާ ނަގަމުންދާއިރުގައި، އެކަމުން ދައުލަތަށް ލިބެންވާ އެއްޗެއް ނުވަތަ ޢާންމު ރައްޔިތު މީހާއަށް ލިބެންވާ މިންވަރު ނުލިބޭތީ ޝަކުވާތަކެއް އެބަ ނުކުންނަ ކަމުގައި ވިދާޅުވިއެވެ. އެހެންކަމުން، ބިމާ ގުޅޭގޮތުން މުޅި ޖުމްލަގޮތެއް އަޅުގަނޑުމެން ނެރޭއިރު، މިހުރިހާ ކަމެއް ފާހަގަކޮށް، އެކަންކަމަށް އަލިއަޅުވާލެވެންޖެހޭނެ ކަމަށް ވިދާޅުވިއެވެ.
ބިމާ ގުޅޭގޮތުން ބަދަލެއް ގެންނަން ބަލާއިރު، އޭގެ ސަބަބުން ވަރަށްގިނަ އެއްޗެހި ނިއުޅިގެންދާ ކަމަށާއި، މި ބޮޑު މަންޒަރަށްވެސް އަޅުގަނޑުމެން ވިސްނަންޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ކަންކަމަށް ޙައްލެއް ގެންނައިރުގައި، އަޅުގަނޑުމެންނަށް ދިމާވާ ހުރިހާ ދަތިތަކާމެދު ވަރަށް ފުންކޮށް ވިސްނަންޖެހޭ ކަމުގައި ވިދާޅުވިއެވެ. މިރޮނގުން ވާހަކަފުޅު ދައްކަވަމުން، ބިމާ ގުޅޭގޮތުން ހުރި ހުރިހާ ގަވާއިދަކާއި ޤާނޫނަކާއި، އަދި ބިމާ ގުޅޭގޮތުން ޝަރީޢަތުން ނިންމާފައި ހުރި ބައެއް ނިންމުންތަކާއި، ޒަމާނުއްސުރެ ފަށައިގެން ވަޤްފު ކޮމިޓީގެ މަސައްކަތްތައް ހިނގާފައި އޮތް ގޮތާއި، އެޗް.ސީ.ޕީ ބެލް، މާލޭގެ ސަރވޭއެއް ހެއްދެވިއިރު، މާލޭގެ ބިން ބޭނުންކޮށްފައި އޮތްގޮތާއި، ފަތްކޮޅުތަކާއި، ލޯމާފާނުތަކުގައި ބިމާ ގުޅޭގޮތުން ޢަމަލުކޮށްފައި ހުރިގޮތް ބައްލަވައިފި ކަމަށާއި، އޭގެ އަލީގައި ބިމާ ގުޅޭ އޮނިގަނޑެއް އެކުލަވާލެއްވުމުގެ މަސައްކަތް، ވަޒީރުންގެ މަޖިލީހުން ކުރައްވަމުން ގެންދަވާކަން ރައީސުލްޖުމްހޫރިއްޔާ ހާމަކުރެއްވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، ބޭނުންފުޅަކީ ހަމަހަމަ ކަމުގައި، ހަމަހަމަ ގޮތުގައި ހުރިހާ ރައްޔިތުންނަށްވެސް އަދި އިޤްތިޞާދީ ފައިދާއަށްވެސް ބިން ބޭނުންކުރެވޭނެގޮތްވުމެވެ.
