ސިފައިންގެ އެންމެ މަތީ ވެރިޔާގެ ވާދައިގެ ތަށްޓަށް ބޭއްވުނު 11 ވަނަ ހެވިކަމުގެ މުބާރާތް ނިމުމުގެ ރަސްމިއްޔާތު ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ މުޙަންމަދު ނަޝީދު ޝަރަފުވެރިކޮށްދެއްވައިފިއެވެ. މިކަމަށްޓަކައި މިރޭ 8.00ގައި ޖުމްހޫރީ މައިދާނުގައި ބޭއްވެވި ރަސްމިއްޔާތަށް ރައީސުލްޖުމްހޫރިއްޔާ ވަޑައިގެންނެވިއިރު، އެމަނިކުފާނުގެ އިސްތިޤްބާލުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިޔުރިޓީ އަމީން ފައިޞަލާއި، ޗީފް އޮފް ޑިފެންސް ފޯސް މޭޖަރ ޖެނެރަލް މޫސާ ޢަލީ ޖަލީލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ފަރުޙަތު ޝަހީރު ތިއްބެވިއެވެ.
ސިފައިންގެ ވެރިޔާގެ ވާދައިގެ ތަށްޓަށް ބޭއްވުނު 11 ވަނަ ހެވިކަމުގެ މުބާރާތުން 1 ވަނައަށް ހޮވުނު ގެމައަށް ތަށްޓާއި މެޑަލާއި ސެޓްފިކެޓް ދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ މުޙަންމަދު ނަޝީދެވެ.
މި ރަސްމިއްޔާތުގައި ހެވިކަމުގެ މުބާރާތުން 1 ވަނަ ހޯދި ގެމައާއި، 2 ވަނަ ހޯދި ގެމައިގެ ހެވިކަން ދައްކާލުން އޮތެވެ. އަދި އަންހެން ސިފައިންގެ ހެވިކަން ދައްކާލުމާއި އަސްކަރީ ފުލުހުންގެ ސައިލެންޓް ޑްރިލް ޑިސްޕްލޭއެއްވެސް ދައްކާލުން އޮތެވެ.
