މިއަދު ރާއްޖެ ވަޑައިގެންނެވި ސަޢޫދީ ޢަރަބިއްޔާގެ ރިޔާޟްގެ ގަވަރނަރ ޕްރިންސް ސަލްމާން ބިން ޢަބްދުލްޢަޒީޒް އަލް ސުޢޫދަށް ދިވެހި ސަރުކާރުން ހޫނު މަރްޙަބާއެއް ދަންނަވައިފިއެވެ. ޕްރިންސް ސަލްމާން މިއަދު މެންދުރުފަހު ރާއްޖެވަޑައިގަތުމުން، މާލޭ ބައިނަލްއަޤްވާމީ ވައިގެ ބަނދަރުން ރައީސުލްޖުމްހޫރިއްޔާގެ ފަރާތްޕުޅުން ޕްރިންސް ސަލްމާނަށް މަރުޙަބާ ވިދާޅުވީ، ސްޕެޝަލް އެންވޯއި އޮފް ދަ ޕްރެޒިޑެންޓް އިބްރާހިމް ޙުސައިން ޒަކީއެވެ. އެއަށްފަހު، ޕްރިންސް ސަލްމާނަށް ވައިގެ ބަނދަރުން މޯލްޑިވްސް ނޭޝަނަލް ޑިފެންސް ފޯސްގެ ފަރާތުން އޮނަރ ގާޑެއް އެރުވިއެވެ.
ޕްރިންސް ސަލްމާން، މާލޭ ޖުމްހޫރީ މައިދާނުން ރައީސުލްޖުމްހޫރިއްޔާގެ އޮފީހަށް ވަޑައިގެންނެވީ ބެރު ދުންމާރި ތާޅަފިލީގައި ހެވިކަމުގެ ލަޝްކަރުގެ ތެރޭގައި ހުންނަވައިގެން، ބޮޑުތަކުރުފާނު މަގުން ހިންގަވާފައެވެ.
ރައީސުލްޖުމްހޫރިއްޔާގެ އޮފީހަށް ވަޑައިގަތުމުން، އެމަނިކުފާނަށް މަރްޙަބާ ވިދާޅުވީ، ރައީސުލްޖުމްހޫރިއްޔާ މުޙަންމަދު ނަޝީދާއި ނައިބު ރައީސް ޑޮކްޓަރ މުޙަންމަދު ވަޙީދާއި، ވަޒީރުންގެ މަޖިލީހުގެ ބައެއް މެންބަރުންނާއި ރައީސުލްޖުމްހޫރިއްޔާގެ އޮފީހުގެ އިސް ބޭފުޅުންނެވެ.
ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޕްރިންސް ސަލްމާން ރާއްޖެއަށް ދަތުރުފުޅެއް ކުރެއްވިކަމީ، ލިބިވަޑައިގެންނެވި ވަރަށްބޮޑު އުފާފުޅެއް ކަމަށް ވިދާޅުވެ، ޕްރިންސް ސަލްމާނަށް ޝުކުރުއަދާކުރެއްވިއެވެ.
ޕްރިންސް ސަލްމާން ދެއްކެވި ވާހަކަފުޅުގައި، ރާއްޖެއަށް މި ކުރެއްވި ދަތުރުފުޅުގައި، ދިވެހި ސަރުކާރުންނާއި ރައީސުލްޖުމްހޫރިއްޔާގެ ފަރާތްޕުޅުން ލިބިވަޑައިގެންނެވި ފުރިހަމަ މެހްމާންދާރީއަށްޓަކައި ޝުކުރުއަދާކުރެއްވިއެވެ.
މިބައްދަލުކުރެއްވުމުގައި ދިވެހިރާއްޖެއާއި ސަޢޫދީ ޢަރަބިއްޔާއާ ދެޤައުމުގެ ދެމެދުގައި އޮންނަ ގާތް ގުޅުމާ ބެހޭގޮތުންވެސް ދެބޭފުޅުން ވާހަކަފުޅު ދެއްކެވިއެވެ.
ޢިއްޒަތްތެރިން ސޮއިކުރައްވާ ފޮތުގައި ސޮއިކުރެއްވުމަށްފަހު، ޕްރިންސް ސަލްމާން، ރައީސުލްޖުމްހޫރިއްޔާގެ އަރިހުގައި ވަޑައިގަތީ ރައީސުލްޖުމްހޫރިއްޔާގެ ރަސްމީ ގެ މުލީއާގެއަށެވެ. އެއީ، ޕްރިންސް ސަލްމާންގެ ޝަރަފުގައި ރައީސުލްޖުމްހޫރިއްޔާ ދެއްވި މެންދުރުގެ ފަރިއްކޮޅެއްގައި ބައިވެރިވެވަޑައިގަތުމަށްޓަކައެވެ.
