ރަށްފުށުގެ ޞިއްޙީ ހާލަތު ރަނގަޅު ކުރުމަށްޓަކައި ރައްޔިތުންގެ މެދުގައި އެއްބައިވަންތަކަމުގެ ގުޅުމެއް ބާއްވައިގެން މަސައްކަތް ކުރަންޖެހޭ ކަމަށް ނައިބު ރައީސް ޑޮކްޓަރ މުޙަންމަދު ވަޙީދު ވިދާޅުވެއްޖެއެވެ. ޑޮކްޓަރ ވަޙީދު މިހެން ވިދާޅުވީ، ހުޅުމާލޭ ހޮސްޕިޓަލުގެ 6 ވަނަ އަހަރީ ދުވަހުގެ މުނާސަބަތުގައި މިރޭ ޣާޒީ ސްކޫލުގައި ބޭއްވެވި ޙަފްލާއެއްގައި ދުނިޔޭގެ މިއަހަރުގެ ޞިއްޙަތު ދުވަހުގެ ޝިޢާރު ކަމަށްވާ "ރަށްވެހިކަމާއި ޞިއްޙަތު" މި ޝިޢާރުގެ މައްޗަށް ބައްލަވާލައްވައި ވާހަކަފުޅު ދައްކަވަމުންނެވެ. މިއަހަރުގެ މި ޝިޢާރަކީ އަޅުގަނޑުމެން އެ ޝިޢާރަކާ ދޭތެރޭ ވިސްނައި ސަމާލުކަން ދޭންޖެހޭ ޝިޢާރެއްކަން ފާހަގަކުރައްވަމުން، ޞިއްޙަތު ގުޅިފައިވަނީ އަޅުގަނޑުމެންގެ ރަށްރަށަށާއި، ޖަމާޢަތަށްކަން މިއަދު އަޅުގަނޑުމެން ހަނދާންކުރަންޖެހޭ ކަމަށް އެމަނިކުފާނު ވިދާޅުވިއެވެ. އަދި އަޅުގަނޑުމެން ދޭންޖެހޭ ޚިދްމަތް ރަނގަޅަށް ދެވޭނީ ސާފުތާހިރު އަދި ޞިއްޙީ ގޮތުން ދިރިއުޅެވޭނެ މާޙައުލެއް އޮވެގެން ކަމަށް ވިދާޅުވެ، ރަށްރަށުގެ ސާފުތާހިރުކަން ޚާއްޞަކޮށް ރަށް ނުސާފުވެ، ކުނި ގިނަވުމުން އުފެދޭ މައްސަލަތަކުގެ މައްޗަށްވެސް އެމަނިކުފާނު ބައްލަވާލެއްވިއެވެ.
ނައިބު ރައީސްގެ ވާހަކަފުޅުގައި، ހުޅުމާލޭ ހޮސްޕިޓަލްގެ 6 ވަނަ އަހަރީ ދުވަހުގެ މުނާސަބަތުގައި އެ ހޮސްޕިޓަލުގެ ވެރިންނަށާއި، ޑޮކްޓަރުންނަށާއި، ނަރުހުންނަށާއި، ހުރިހާ މުވައްޒަފުންނަށް ދުވަހުގެ އިޚްލާޞްތެރި ތަހުނިޔާ ފޮނުއްވިއެވެ. އަދި ބަލި މީހުން މާލެއަށް ނުގެނެސް ހުޅުމާލޭ ހޮސްޕިޓަލުން ފަސޭހަކަމާއެކު ޚިދްމަތްދެވޭ ފެންވަރަށް އެ ހޮސްޕިޓަލް ތަރައްޤީ ކުރުމުގެ މުހިންމުކަމުގެ މައްޗަށްވެސް ނައިބު ރައީސް ބައްލަވާލެއްވިއެވެ.
ނައިބު ރައީސްގެ ވާހަކަފުޅު ނިންމަވާލައްވަމުން، ހެލްތް ކޯޕަރޭޝަން އުފެއްދުމުގެ މުހިންމު ކަމުގެ މައްޗަށްވެސް އަލިއަޅުއްވާލެއްވިއެވެ. މިރޮނގުން ވާހަކަފުޅު ދައްކަވަމުން، ހެލްތް ކޯޕަރޭޝަނަކީ، ޞިއްޙީ ޚިދްމަތް ރަނގަޅަށް ރައްޔިތުންނަށް ފޯރުކޮށްދެވޭނެ ނިޒާމެއް ކަމަށް ވިދާޅުވިއެވެ.
