ރާއްޖޭގެ މަތީ ތަޢްލީމުގައި ޢާންމުކޮށް ބައިވެރިވާ ޢުމުރުފުރައިގެ އާބާދީގެ ތެރެއިން މަތީ ތަޢްލީމް ލިބިގަންނަ އާބާދީގެ ނިސްބަތް، (ގްރޮސް އެންރޯލްމަންޓް ރޭޝިއޯ) މަތިކުރެއްވުމަށްޓަކައި، އެންމެ ފުރަތަމަ މަސައްކަތްތައް އަމާޒު ކުރަންވީ ސްކޫލް ސިސްޓަމަށާއި، އޭ.ލެވެލްގައި ބައިވެރިވާ ކުދިންގެ ޢަދަދު އިތުރުކުރެއްވުމަށް ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ އަޑު މެދުވެރިކުރައްވައި، އެމަނިކުފާނު މިއަދު ހެނދުނު ދެއްވި ހަފްތާގެ ރޭޑިޔޯ ޚިޠާބުގައި، ރާއްޖޭގެ ގްރޮސް އެންރޯލްމަންޓް ރޭޝިއޯ 40 އިންސައްތައަށް ގެންދެވުމަށްޓަކައި ސަރުކާރުން އަޅުއްވަން ހަމަޖައްސަވާފައިވާ ޚާއްޞަ ފިޔަވަޅުތަކުގެ މައްޗަށް ބައްލަވައިލައްވައި ވާހަކަފުޅު ދައްކަވަމުންނެވެ.
ރާއްޖޭގައި ކިޔަވާ ކޮންމެ ހަތަރު ކުދިންގެ ތެރެއިން ތިން ކުދިން ހަދަނީ ކޮމާސް ކަމަށާއި، ނަތީޖާއަކީ ވަރަށްގިނަ ވަޒީފާތަކަށާއި، މަތީ ތަޢްލީމަށް އޮންނަ ފުރްޞަތުން އެކުދިން މަޙްރޫމްވުމާއި، މަސައްކަތްތެރި ކަމަށް އެކުދިން ބީރަށްޓެހިވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެހެންކަމުން، ކުރިއަށް އޮތް ފަސް އަހަރު ދުވަހުގެ ތެރޭގައި، ގްރޮސް އެންރޯލްމަންޓް ރޭޝިއޯ ނުވަތަ ރާއްޖޭގެ މަތީ ތަޢްލީމުގައި ޢާންމުކޮށް ބައިވެރިވާ ޢުމުރުފުރައިގެ އާބާދީގެ ތެރެއިން މަތީ ތަޢްލީމް ލިބިގަންނަ އާބާދީގެ ނިސްބަތް 40 އިންސައްތައަށް ގެންދެވުމަށްޓަކައި ޚާއްޞަ ފިޔަވަޅުތަކެއް އަޅުއްވަން ޖެހިވަޑައިގެންފައިވާކަމަށް ވިދާޅުވިއެވެ. އަދި ދުނިޔޭގެ އާ އިޤްތިޞާދުގައި ކާމިޔާބު ހޯދުމަށްޓަކައި 40 އިންސައްތައާއި 50 އިންސައްތައާ ދެމެދުގެ ގްރޮސް އެންރޯލްމަންޓް ރޭޝިއޯއެއް ހޯދުމަށް، ތަރައްޤީވަމުން އަންނަ ޤައުމުތައް މަސައްކަތް ކުރަން ޖެހޭނެ ކަމަށް ބައިނަލްއަޤްވާމީ އެތައް ޖަމާޢަތަކުންނާއި ޖަމްޢިއްޔާއަކުން ފާހަގަކުރަމުން ގެންދާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މިގޮތުން ސަރުކާރުން އަޅުއްވަމުން ގެންދަވާނެ ބައެއް ފިޔަވަޅުތަކުގެ މައްޗަށް ރައީސުލްޖުމްހޫރިއްޔާ ބައްލަވައިލައްވަމުން، އެއްކަމަކީ ދިވެހިރާއްޖޭގެ ޤައުމީ ޔުނިވަރސިޓީގެ ބިލް، ރައްޔިތުންގެ މަޖިލީހުގެ ތަޅުމަށް އަވަހަށް ގެންނަވައި، އެ ބިލް އަވަހަށް ނިންމެވުން ކަމުގައި ވިދާޅުވިއެވެ. އެބިލް މިހާރު ކޮމިޓީއަށް ހުށަހެޅި، ކޮމިޓީގެ މަސައްކަތްތައް ނިމުމަކާ ގާތްވެފައިވުމާއެކު، ދާދި އަވަހަށް އެބިލް މަޖިލީހުގެ ތަޅުމަށް އަތުވެދާނެ ކަމަށް އުންމީދު ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ހަމައެއާއެކު، މަތީ ތަޢްލީމަށްޓަކައި ހިންގަވަން ބޭނުންވާ އަނެއް މަސައްކަތަކީ، ސަރުކާރުގެ ތެރޭގައި ހުރި ދިރާސާ ކުރުމާ ގުޅުންހުރި މަސައްކަތްތައް ބައްލަވައި، އެމަސައްކަތްތައް ސަރުކާރުން ވަކިކުރައްވައި، ޔުނިވަރސިޓީއާ އެމަސައްކަތްތައް ޙަވާލުކުރެއްވުންކަން ރައީސުލްޖުމްހޫރިއްޔާ ހާމަކުރެއްވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، މިގޮތަށް ހަމަޖެއްސުމުން، ލިބޭނެ މައިގަނޑު ފައިދާތަކުގެ ތެރޭގައި، ފާހަގަވާ އެއްކަމަކީ، ފަންނީ މާހިރުންނަށްވުމުގެ ފުރްޞަތު، ޔުނިވަރސިޓީ ކުދިންނަށް ލިބުމެވެ. ހަމައެހެންމެ، ދަރިވަރުން މެދުވެރިކޮށް ބައެއް ދިރާސާތައް ކުރުމުގެ ފުރްޞަތު، ފަންނީ އެދުރުންނަށް ލިބުމާއި، ހަމައެއާއެކު، ވަސީލަތްތައް ޙިއްޞާ ކުރުމެވެ.
ރައީސުލްޖުމްހޫރިއްޔާ މިއަދު ދެއްވި ރޭޑިޔޯ ޚިޠާބުގައި، މި ފިޔަވަޅުތަކުގެ މައްޗަށް ބައްލަވައިލައްވަމުން، ޞިއްޙީ ޚިދްމަތް ރަނގަޅަށް ދިނުމަށް ރާއްޖޭގައި މެޑިސިން ކިޔަވައިދޭން ފެށުމަކީ ވަރަށް މުހިންމު ކަމެއްކަން ހާމަކުރެއްވިއެވެ. ރާއްޖޭގެ އާބާދީ އިތުރުވަމުންދާއިރު، ރާއްޖޭގައި މެޑިސިން ކިޔަވައިދޭން ނުފަށައިފިނަމަ، ޞިއްޙީ ޚިދްމަތް ފުޅާކުރުމަށް އަދި ރަނގަޅު ކުރުމަށް މުސްތަޤްބަލުގައި ގޮންޖެހުންތަކެއް ކުރިމަތިވާނެކަން އެމަނިކުފާނު ބަޔާންކުރެއްވިއެވެ. ހަމައެއާއެކު، ރާއްޖޭގައި ކިޔަވައިދޭ ކޯސްތަކުގައި ކޮންމެހެން ރާއްޖެއިން ބޭރުން ހޯދަންޖެހޭ ތަމްރީނު ހޯދުމަށް ލޯނު ދޫކުރެއްވުންވެސް އެއީ ސަރުކާރުގެ އަމާޒެއް ކަމަށް ވިދާޅުވެ، މިގޮތުން ނަރުސްކަމާއި، ޞިއްޙަތާބެހޭ އެހެނިހެން ބައެއް ތަމްރީނުތަކާއި، ރާއްޖެއިން ބޭރުން ހޯދަންޖެހޭ ކުރު މުއްދަތުގެ ތަމްރީނު ހޯދުމަށް 50 ކުއްޖަކަށް މިއަހަރު ލޯން ދޫކުރައްވާ ގޮތަށް ހަމަޖެހިފައިވާކަން އެމަނިކުފާނު ހާމަކުރެއްވިއެވެ. އަދި މިލޯނު ދެއްވުމަށް ހަމަޖެހިފައިވަނީ ހަމައެކަނި ފެކަލްޓީ އޮފް ހެލްތް ސައިންސަސްގެ ދަރިވަރުންނަށް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
އާ ދާއިރާތަކުން ޑިގްރީއަށް ކިޔަވައިދޭން ފެށްޓެވުމަކީވެސް މިފިޔަވަޅުތަކުގެ ތެރޭގައި ހިމެނޭ ކަމެއް ކަމަށް ވިދާޅުވެ، މިގޮތުން އާކިޓެކްޗަރ ދާއިރާއިން ޖޫންމަހު ޑިގްރީ ކޯހެއް ފަށްޓަވާ ގޮތަށް ހަމަޖެހިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ކޮންޓިޓީ ސަރވޭގެ ރޮނގުންނާއި، ޓައުން ޕްލޭނިންގެ ރޮނގުން ކޯސްތައް އެކުލަވައިލުމުގެ މަސައްކަތްވެސް މިހާރު ހިނގަމުންދާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނު ވިދާޅުވިގޮތުގައި، މިކަމުގެ ބޭނުމަކީ މާލެއަށްވުރެ ރަނގަޅަށް ޕްރޮވިންސްތަކުގެ ޢުމްރާނީ ތަރައްޤީ ގެންދެވުމާއި، އެކަމަށް ބޭނުންވާ ހުނަރުވެރިން އުފެއްދެވުމެވެ. ހަމައެއާއެކު، ޤާނޫނީ ދާއިރާ ހަރުދަނާ ކުރެއްވުމަކީވެސް މުހިންމު ކަމެއް ކަމަށާއި، ރާއްޖޭގެ ޤާނޫނީ ދާއިރާ ހަރުދަނާ ކުރެއްވުމަށް ޖަރުމަން ސަރުކާރުން ދެއްވާ އެހީގެ ދަށުން މަޝްރޫޢެއް އެކުލަވައިލައްވައި، އެމަޝްރޫޢު، އަންނަ އަންގާރަ ދުވަހު ކަމާބެހޭ ފަރާތްތަކަށް ހުށަހެޅުއްވުމަށް ހަމަޖެހިފައިވާކަންވެސް އެމަނިކުފާނު ހާމަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިއަދު އެމަނިކުފާނު މިދެއްކެވި ހުރިހާ ވާހަކަފުޅުތައް ވަރަށް ބޮޑަށް ގުޅިފައި ހުރީ ރާއްޖޭގެ މަތީ ތަޢްލީމުދޭ މުއައްސަސާއާ ކަމަށް ވިދާޅުވެ، މިވަގުތު އެ މުއައްސަސާގެ ވެރިންގެ ގޮތުގައި ތިއްބެވި ބޭފުޅުންނަކީ ވަރަށް ޤާބިލު ބޭފުޅުންކަން ފާހަގަކުރެއްވިއެވެ. އަދި އެބޭފުޅުންނާއެކުގައި އެމަނިކުފާނު މިބޭނުންފުޅުވާ ލަނޑުދަނޑިތައް އެބޭފުޅުންނާއެކުގައި ޙާޞިލުވާނެކަމާމެދު ޝައްކު ނުކުރައްވާ ކަމުގައިވެސް ވިދާޅުވިއެވެ.
