ޕަބްލިކް ޕްރައިވެޓް ޕާޓްނަރޝިޕްގެ ދަށުން ސަރުކާރުން ވިޔަފާރީގެ އުޞޫލުން ހުޅުއްވައިލައްވާ ކަންކަމުގައި، ބައިނަލްއަޤްވާމީ ފަރާތްތަކާ ވާދަކުރައްވައިގެން، ދިވެހި ވިޔަފާރިވެރިންނަށް ކުރިނުހޯއްދެވޭންވީ ހަމަ އެއްވެސް ސަބަބެއް ނެތް ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން، ސީ.އެޗް.އެސް.ސީ އެނެކްސް، ވިލާ ކޮލެޖާ ޙަވާލުކުރެއްވުމުގެ އެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މިއެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ، މިނިސްޓަރ އޮފް އެޑިޔުކޭޝަން ޑޮކްޓަރ މުޞްޠަފާ ލުޠުފީއެވެ. ވިލާ ކޮލެޖުގެ ފަރާތުން ސޮއިކުރެއްވީ، އެ ކޮލެޖުގެ ރެކްޓަރ ޑޮކްޓަރ އަޙްމަދު އަންވަރެވެ.
މިކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ވިލާ ކޮލެޖަށް މިފުރްޞަތު ލިބިފައިވަނީ، ބައިނަލްއަޤްވާމީ ފަރާތްތަކާ ވާދަކުރައްވައިގެން ކަމަށާއި، އެއްވެސް ޙާލެއްގައި ޕްރައިވަޓައިޒޭޝަން ކޮމިޓީއިން ވިލާ ކޮލެޖަށް ކުޑަވެސް ދުލެއް ދެއްވައިގެން ނޫން ކަމުގައި ވިދާޅުވިއެވެ. އަމިއްލަ ފަރާތްތައް ބައިވެރިކުރައްވައިގެން ހިންގެވެން ހުރި ގިނަ ކަންކަން އަމިއްލަ ފަރާތްތަކަށް ދޫކުރައްވައިގެން ހިންގެވުމަކީ، ރާއްޖޭގެ ރައްޔިތުންނަށާއި، ރާއްޖޭގެ ތަރައްޤީއަށް އަދި ސަރުކާރަށްވެސް ނުހަނު ފައިދާހުރި ގޮތެއްކަން ބަޔާންކުރައްވަމުން، ސަރުކާރުގެ އަމާޒަކީ ސަރުކާރުން ކުރައްވާ ޚަރަދަށް ރަނގަޅު ފައިދާއެއް، ރަނގަޅު ޚިދްމަތެއް ލިބުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. މިރޮނގުން ވާހަކަފުޅު ދައްކަވަމުން، ސީ.އެޗް.އެސް.ސީ އެނެކްސްގައި މިހާރު ކިޔަވަމުންދާ 800 ކުދިންގެ ފީ، ވިލާ ކޮލެޖަށް ސަރުކާރުން ދައްކަވައިދެއްވާނެ ކަމަށާއި، ސީ.އެޗް.އެސް.ސީ. އެނެކްސްގެ ގްރޭޑް 11 އަށް އަލަށް ވަންނަން ބޭނުންވާ ކުދިންނަށް މިއަންނަ އަހަރުވެސް ސަރުކާރުން އެހީއެއް ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޤައުމެއް ތަރައްޤީވެދިއުމަށް ބޭނުންވާ އެންމެ މުހިންމު ވަސީލަތަކީ، ތަޢްލީމުކަން ބަޔާންކުރައްވަމުން، ތަރައްޤީ މިނަނީކީއެއް ރަށްރަށަށް އަޅާ ކޮންކްރީޓްގެ ޢަދަދަކުން ނޫން ކަމުގައި ވިދާޅުވިއެވެ. ޙަޤީޤީ ތަރައްޤީއަކީ އަޅުގަނޑުމެންގެ ސިކުނޑީގެ ތަރައްޤީ ކަމަށާއި، ތަންދޮރު އެނގުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސީ.އެޗް.އެސް.ސީ އެނެކްސް މިހިންގަވާ އުޞޫލުން ސަރުކާރުން ކުރިއަށް އޮތް ތިން އަހަރު ދުވަހުގެ ތެރޭގައި، މަދުވެގެން މިބާވަތުގެ 8 މަދަރުސާ ރާއްޖެއަށް ތަޢާރުފު ކުރައްވަން އަމާޒު ކުރައްވާފައިވާކަންވެސް ރައީސުލްޖުމްހޫރިއްޔާ ހާމަކުރެއްވިއެވެ. އަދި ވިލާ ކޮލެޖުގެ ބާނީ ޤާސިމް އިބްރާހީމް، ދިވެހި މުޖްތަމަޢަށް މިކޮށްދެއްވަމުން ގެންދަވާ ޚިދްމަތްތައް ފާހަގަކުރައްވައި، އޭނާއަށް ވަރަށް އިޚްލާޞްތެރިކަމާއެކު ރައީސުލްޖުމްހޫރިއްޔާ ޝުކުރު އަދާކުރެއްވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، ޤާސިމް އިބްރާހީމަކީ އަބަދުވެސް މި ދިވެހި މުޖްތަމަޢުގައި އެހެން ބޭބޭފުޅުންނަށްވުރެ ދެތިން ފިޔަވަޅު ކުރީގައި ހުންނަވާ ބޭފުޅެކެވެ.
މިރަސްމިއްޔާތު ތަޢާރުފު ކުރެއްވުމުގެ ގޮތުން ވާހަކަފުޅު ދެއްކެވީ، ޕްރައިވަޓައިޒް ކޮމިޓީގެ ޗެއަރމަން، މިނިސްޓަރ އޮފް ސިވިލްއޭވިއޭޝަން އެންޑް ކޮމިއުނިކޭޝަން މަޙްމޫދު ރާޒީއެވެ. މި ރަސްމިއްޔާތުގައި މިނިސްޓަރ އޮފް އެޑިޔުކޭޝަން ޑޮކްޓަރ މުޞްޠަފާ ލުޠުފީއާއި، ވިލާ ކޮލެޖުގެ ރެކްޓަރ ޑޮކްޓަރ އަޙްމަދު އަންވަރުވެސް ވާހަކަފުޅު ދެއްކެވިއެވެ.
