ރައީސުލްޖުމްހޫރިއްޔާ އަމިއްލަ ދަތުރުފުޅެއްގައި ބުދަ ދުވަހުގެ ރޭ މެލޭޝިޔާއަށް ފުރާވަޑައިގެންނެވި ޚަބަރު، އެމަނިކުފާނު ފުރާވަޑައިގެންނެވި ވަގުތުން ފެށިގެން ވަރަށް ތަފްޞީލުކޮށް ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިޢުކޮށްފައި ވަނިކޮށް، އަދި އެމަނިކުފާނުގެ ދަތުރުފުޅާ ގުޅޭ މަޢުލޫމާތު ނޫސްވެރިންނާ ހިއްސާކޮށްފައި ވަނިކޮށް، ބުރާސްފަތި ދުވަހުގެ ފަތިހުން ފެށިގެން ވަކިވަކި ނޫސްވެރިންނަށާއި، ނޫސް އިދާރާތަކަށާއި ބައެއް ޢާއްމު ފަރާތްތަކުގެ މޮބައިލްފޯނަށް، އަޅުގަނޑުގެ މޮބައިލް ފޯނު ނަންބަރާއި އަޅުގަނޑުގެ ނަން ބޭނުންކޮށްގެން ފޮނުވަމުންދާ އެސްއެމްއެސްތަކަކީ ޙަޤީޤަތާ ޚިލާފު، ޞައްޙަ ނޫން އެސްއެމްއެސްތަކެއް ކަމުގައި ދަންނަވަމެވެ. އަދި މިއީ ރައީސުލްޖުމްހޫރިއްޔާ އާއި އެމަނިކުފާނުގެ ޢާއިލާއާ ގުޅުވައިގެން އަޅުގަނޑުގެ މޮބައިލް ފޯނު ނަންބަރާއި، ނަން ބޭނުންކޮށްގެން އެސްއެމްއެސްގެ ޒަރީޢާއިން ފޮނުވަމުންދާ ދޮގު މަޢުލޫމާތުތަކެއް ކަމުގައި ވާތީ، މި ދަށުދަރަޖައިގެ ނާތަހުޒީބު ޢަމަލު އެންމެ ހަރުކަށި ޢިބާރާތުން ކުށްވެރިކުރަމެވެ. އަދި މިމައްސަލަ ކަމާ ގުޅުންހުރި މުއައްސަސާތަކުގެ ސަމާލުކަމަށް ގެނައުމުގެ މަސައްކަތް ރައީސުލްޖުމްހޫރިއްޔާގެ އޮފީހުގެ ފަރާތުން ކުރަމުންދާ ވާހަކަ ދަންނަވަމެވެ.
